काठमाडौं: निजी क्षेत्रको आन्तरिक वायुसेवा कम्पनी सौर्य एयरको जहाज ग्राउन्डेड भएको (बिग्रिएर थन्किएको) छ । बुधबार बिहान विराटनरबाट काठमाडौं आएपछि जहाजको कोपाइलटतर्फ अगाडिको झ्यालको सिसा टुटेको छ । सिसामा देखिएको सानो क्र्याकले पनि विन्डो हिटमा समस्या आउँछ । सुरक्षा संवेदनशीलतालाई ध्यान दिएर जहाज ग्राउन्डेड गरिएको सौर्य एयरलाइन्सले जानकारी दिएको छ ।
ग्राउन्डेड जहाज मर्मत गरेर उडान गर्न करिब चार दिन लाग्ने सौर्य एयरलाइन्सका प्रबन्ध निर्देशक गोपाल भट्टराईले जानकारी दिए । उनका अनुसार झ्यालको सिसा नै फेर्नुपर्ने र त्यो सामान अमेरिकारबाट मगाउनुपर्ने भएकाले समय लाग्ने भएको हो । यो सामानका लागि करिब ३० देखि ४० लाख रुपैयाँ खर्चलाग्ने उनको भनाइ छ ।
जहाज ग्राउन्डेड हुँदा सौर्यका दैनिक पाँचवटा उडान प्रभावित भएका छन् । सौर्यसँग एउटा मात्रै जहाज भएकाले सानो प्राविधिक समस्या आउँदा पनि शत्प्रतिशत उडान रद्द हुने भट्टराईले बताए ।
सीआरजे २०० नामक जहाज उडाइरहेको सौर्यले काठमाडौंबाट नेपालगन्ज, विराटनगर र भद्रपुरमा गरी दैनिक पाँच ६ वटा उडान सञ्चालन गरेको छ । यो जहाजको सबै उडान रद्द हुँदा दैनिक दुई सयदेखि दुई सय ५० जना यात्रु प्रभावित भएका छन् ।
आकस्मिक टिकट पाउन पनि समस्या
यात्रु चाप बढेकाले कुनै यात्रुले आकस्मिक टिकट लिनुपर्दा उपलब्ध गराउन सक्ने अवस्था नरहेको बुद्ध एयरका अपरेसन म्यानेजर सुवर्ण खरेलले बताए । उनका अनुसार बुद्ध एयरले दैनिक ३६/३७ वटा उडान विभिन्न गन्तव्यका लागि गरिरहेको छ । यात्रु चाप बढी हुने गन्तव्यमा अतिरिक्त उडान थप गर्दा पनि टिकट नपाइने समस्या बढेको उनले बताए ।
बुद्धले सबैभन्दा बढी उडान काठमाडौंबाट छोटो गन्तव्य भए पनि भरतपुरको लागि गरेको छ । यो गन्तव्यमा मात्रै दैनिक आठवटासम्म उडान भइरहेको बुद्धले जानकारी दिएको छ । बुद्धले अन्य समयमा दैनिक दुईवटा मात्रै उडान गर्ने यो गन्तव्यमा दसैं र मुग्लिन–नारायगढ सडकखण्डमा हुने सवारी जामका कारण उडान चाप बढेको छ ।
स्थलमार्गबाट यात्रु गन्तव्य समयमा नै पुग्ने भर नभएकोले पनि काठमाडौंबाट भरतपुरसम्म टिकट लिने र पूर्व र पश्चिमका गन्तव्यमा जाने गरेको बुद्ध एयरको भनाइ छ । अन्य वायुसेवा कम्पनीले पनि यात्रु चाप बढेको बताएका छन् । आन्तरिक उडानमा बुद्ध, यती, तारा, वायुसेवा निगम, सिम्रिक एयरको उडान सञ्चालन भए पनि दसैंका कारण सबै गन्तव्यमा उडान चाप रहेको उल्लेख छ । इन्फोजहाज ग्राउन्डेड हुँदा सौर्यका दैनिक पाँचवटा उडान प्रभावित भएका छन् ।
प्रतिक्रिया दिनुहोस !
