साझा बसलाई भक्तपुर छिर्न नदिइने

भक्तपुरः भक्तपुरका बस व्यवसायी तथा मजदुरले साझा बसलाई भक्तपुरमा चल्न नदिने भएका छन् ।

भक्तपुरका व्यवसायीकै करिब एक हजार गाडी सञ्चालन हुँदाहुँदै साझाको थप गाडी सञ्चालन गरिए आफूहरु विस्थापित हुने भन्दै उनीहरुले साझालाई भक्तपुर छिर्नै नदिने बताएका हुन् ।

कोटेश्वर पूर्वयातायात समितिका संयोजक बलराम त्वानाबासुको संयोजकत्वमा बिहीबार भक्तपुरका बस व्यवसायी तथा मजदुरको संयुक्त बैठकले साझालाई भक्तपुर छिर्न नदिने निर्णय गरेको हो ।

उनीहरुले स्थानीयको चाहना र माग ठूला गाडी भए आफूहरुले पनि ठूला गाडी चलाउन सक्षम र तयार रहेको निर्णय गरेका छन् ।

‘साझाका जस्तै ठूला गाडी स्थानीयको चाहना र माग भए भक्तपुरकै व्यवसायीहरु यस्ता गाडी चलाउन सक्षम र तयार छन्’, बैठकमा सहभागी नेपाल यातायात स्वतन्त्र मजदुर संगठनका भक्तपुर इन्चार्ज प्रकाश बस्नेतले भने, ‘बैठकले साझालाई भक्तपुर छिर्न नदिने एकमतले निर्णय गरेको छ ।’

उनले साझाले भक्तपुरमा सेवा दिनेवित्तिकै यहाँका करिब एक हजार गाडीका धनी तथा मजदुरहरु प्रभावित हुने बैठकले निष्कर्ष निकालेको जानकारी दिए ।
भक्तपुरस्थित भक्तपुर मिनिबस सेवा समितिले ७ नम्बर रुटमा तीनसय दस, पुरानो बाटो बस व्यवसायी संघले ९ र १० नम्बर रुटमा चार सयभन्दा बढी र मध्य उपत्यका बस व्यवसायी संघले १ नम्बर रुटमा दुई सयभन्दा बढी सवारीसाधन सञ्चालन गर्दै आएका छन् ।

यी चार वटा रुटमा चल्ने गाडीमा करिब तीन हजार सवारी धनी र ६ हजारको हाराहारीमा चालक तथा सहचालक आश्रित रहेको बस व्यवसायीहरु बताउँछन् ।

साझाले भक्तपुरमा आफ्नो पुरानो रुटमा हाललाई दैनिक दसवटा गाडी सञ्चालनमा ल्याउने तयारी गर्दै आएको छ । जसअनुसार काठमाडौंको कलंकीबाट कालीमाटी, त्रिपुरेश्वर, सुन्धारा, रत्नपार्क, पुतलीसडक, अनामनगर, हनुमानस्थान, बानेश्वर, कोटेश्वर हुँदै जडिबुटी र भक्तपुरतर्फ ६ लेन सडक हुँदै सल्लाघारी, दूधपाटी, व्यासी, देकोचा, कमलविनायक, च्याम्हासिंह, जगाती, सूर्यविनायक हुँदै ६ लेन सडकबाटै काठमाडौं फर्कने छ ।

हाल भक्तपुरमा चल्ने सबै समितिका गाडीहरु साझाले प्रस्ताव गरेकै रुटमा चल्छन् । अझ अरनिको राजमार्ग भई काभ्रेको धुलिखेल, बनेपा र पनौतीका करिब पाँच सय गाडीसमेत चल्छन् । यी तीन रुटमा चल्ने गाडीसँग भक्तपुरका गाडीहरुले प्रतिस्पर्धा गर्न सकेका छैनन् । त्यसमाथि साझा थपिएपछि आफूहरु थप मारमा पर्ने देखेर भक्तपुरका यातायात व्यवसायीहरुले साझालाई भक्तपुर छिर्न नदिने निष्कर्षमा पुगेका हुन् ।

बिहीबार बसेको बैठकमा भक्तपुरको सबैभन्दा पुरानो बस समिति भक्तपुर मिनिबस सेवा समिति भने सहभागी भएको थियो ।
समितिका अध्यक्ष ज्ञानेन्द्र महर्जनले साझा भक्तपुर आउनुभन्दा नआएकै राम्रो हुने बताउँछन् । उनले साझाले भक्तपुरमा आफ्नो बस सञ्चालन गर्ने कुनै आधिकारिक जानकारी दिनुका साथै गाडी चल्ने एकिन नगरेकाले समितिले कुनै प्रक्रिया अघि नबढाएको जानकारी दिए ।

‘साझाले कहिलेदेखि बस सेवा सञ्चालन गर्ने हो त्यसबारे आधिकारिक जानकारी दिएको छैन’, उनले भने, ‘दसैंअघि देखि नै बस चलाउने भनेको तर अहिलेसम्म निश्चित भएको छैन । त्यसैले यसमा हामीले कुनै प्रक्रिया अघि बढाएका छैनौं । तर साझा आउँदा सबैभन्दा बढी मारमा हामी नै पर्ने हो ।’
उनले साझा ल्याएर समस्या बढाउने भन्दा भक्तपुरकै रहेका व्यवसायी र मजदुरहरुसँग समन्वय गरेर अघि बढ्नुपर्ने धारणा राखे ।

भक्तपुरका सर्वसाधारणले काठमाडौं र ललितपुरबाट ढिला भक्तपुर फर्कनुपर्दा गाडी नपाइने गुनासो गर्दै आएका छन् । त्यस्तै यहाँका बस सेवा छिटो छरितो नहुनुका साथै एक्सप्रेस भनिए पनि लोकलजस्तै भएको गुनासो भक्तपुरका यात्रुहरुले आरोप लगाउँदै आएका छन् ।

त्यस्तै भक्तपुरबाट ग्रामीण क्षेत्रमा जाने गाडी पनि ढिलो गरी नचल्ने हुँदा धेरै सास्ती खेप्नुपर्दै आएको यात्रुहरु बताउँछन् ।