पृथ्वी राजमार्ग ४० घन्टामा पनि दुईतर्फी खुलेन
दमौलीः बिहीबार दोहोरो सवारी आवतजावत गराउने लक्ष्य राखिए पनि पृथ्वी राजमार्ग ४० घन्टासम्म खुल्न सकेन । तनहुँको आँबुखैरेनी ८ ऐनापहरोमा पहिरो खस्दा दुई तर्फी सवारी साधन सञ्चालन हुन सकेका छैनन् ।
दशैंका कारण दैनिक आवतजावत गर्ने सवारी साधनको चाप बढिरहेका कारण राजमार्गमा बुधबारदेखि दिनरात जाम भइराखेको छ ।
ढुंगा खस्ने क्रम जारी रहेको र सवारीको चाप उच्च रहेका कारण दुईतर्फी सडक खुलाउन नसकिएको तनहुँका ट्राफिक प्रमुख ज्ञानेन्द्रबहादु थापाले बताए । उनले दिनभर पहिरो हटाउन डोजर खटाइएको बताए । अनवरत प्रयास गरिरहे पनि पहिरो खस्ने क्रम नरोकिंदा समस्या भएको थापाले बताए ।
पुरै पहिरो हटाउँदा राजमार्गको यातायात नै अवरुद्ध हुने भएका कारण छेउछाउबाट मात्र पहिरो हटाउने काम भैरहेको ट्राफिक प्रमुख थापाले बताए ।
प्रमुख जिल्ला अधिकारी दीपक सुवेदीले सबै श्रोत साधनको प्रयोग गरेर पहिरो हटाउने प्रयास भइरहे पनि वर्षाका कारण पहिरो थपिने क्रम जारी छ ।
प्रतिक्रिया दिनुहोस !
