पहिरोले चतरा–बराहक्षेत्र सडक अवरुद्ध

धरानः लगातारको वर्षाका कारण पहिरो झरेपछि सुनसरीको प्रशिद्ध धार्मिक स्थल बराहक्षेत्र जाने मोटरबाटो अवरुद्ध भएको छ ।

पहिरोले सडक पुरेपछि बडादसैंको अवसर पारेर बराहक्षेत्र दर्शन गर्न आउने हजारौं तीर्थयात्री बीचबाटोमै अलपत्र परेका छन् । पहिरोले मोटरबाटो पुरेको तीन दिन बितिसक्दासमेत सडक विभागले खुलाउन पहल नगरेको भन्दै स्थानीयवासी आक्रोशित बनेका छन् ।

लगातारको वर्षासँगै झरेको पहिरोले बराहक्षेत्र गाविसमा पर्ने धनसार खोलानजिकैको सडक पहिरोले पुरेको छ । सडक पुरिएपछि यातायातका साधन सञ्चालनमा समस्या हुनुका साथै पैदल यात्रामा समेत असर परेको सुनसरीका प्रहरी प्रमुख एसपी पोषराज पोखरेलले बताए ।

पहिरोले सडक पुरेपछि सुनसरीको धरान, इटहरी र झुम्कादेखि चतरा हुँदै बराहक्षेत्र धाम जाँदै गरेका दर्जनौं सवारी साधन र सयौं यात्रु बीचबाटोमा अलपत्र परेका छन् ।

पहिरोले सडक अवरुद्ध पारेपछि जिल्ला प्रहरी कार्यालय सुनसरीबाट प्रहरी परिचालन गरी स्थानीय बासिन्दाको सहयोगमा बाटो खुलाउने प्रयास भइरहेको एसपी पोखरेलले जानकारी दिए । पहिरोका कारण पैदल यात्रा गर्नसमेत कठिन भएपछि बाटो खुलाउन प्रहरी परिचालन गरिएको उनले बताए ।

धनसार खोलाछेउको करिब ४० मिटरभन्दा अग्लो भीरबाट पहिरो खसेर ५० मिटर सडक बगाएपछि चतरा–बराहक्षेत्र सडक अवरुद्ध बनेको हो ।

पहिरो हटाउन शुक्रबार बिहानैदेखि प्रहरी परिचालन गरिएको भए पनि जनशक्ति अभावका कारण खुलाउन सकिएको छैन । नेपाल यातायात स्वतन्त्र मजदुर संगठन कोसी अञ्चलका उपाध्यक्ष लक्ष्मी बानियाँले तत्काल चतरा-बराहक्षेत्र मोटरबाटो सञ्चालनमा ल्याउन माग गरेका छन् । सडक विभागको लापरबाहीका कारण यातायात मजदुर रातभर सवारीका साधान कुरेर बस्न बाध्य भएको उनको भनाइ छ ।