नेपाल एसिया कपमा
काठमाडौः विश्व कप क्रिकेट छनोटबाट बाहिरिएको नेपाल एसिया कपका लागि भने छनोट भएको छ । अन्तर्राष्ट्रिय क्रिकेट काउन्सिल (आईसीसी) महिला विश्वकप २०१७ को एसियाली छनोटअन्तर्गत शनिबार भएको खेलमा नेपालले चीनलाई चार विकेटले पराजित गरी एसिया कप यात्रा तय गरेको हो । प्रतियोगिताअन्तर्गत आफ्नो अन्तिम खेलमा प्राप्त यो जितपछि नेपाल उपविजेता बन्यो ।
चार टोली सहभागी प्रतियोगितामा नेपाल पाँच खेलबाट ६ अंक जोडेर दोस्रो स्थानमा रह्यो । १० अंक भएको थाइल्यान्ड अपराजित रहँदै विजेता बन्यो । तेस्रो स्थानमा रहेको हङकङले चार अंक जोड्यो । प्रतियोगिताबाट थाइल्यान्डबाहेक एक शीर्ष टोली छनोट हुने प्रावधान थियो । आयोजकका रूपमा थाइल्यान्ड यसअघि नै छनोट भइसकेको थियो ।
सन् २००७ देखि अन्तर्राष्ट्रिय क्रिकेट खेल्न थालेको नेपाली महिला टोली एसिया कपमा छनोट भएको यो पहिलो अवसर हो । एसिया कपमा एसियाका चार टेस्ट राष्ट्रसहित नेपाल र थाइल्यान्ड सहभागी हुनेछन् । शनिबार नै भएको अर्को खेलमा थाइल्यान्डले हङकङलाई सात विकेटले हराइदिएपछि नेपाली राष्ट्रिय महिला क्रिकेट टोलीको एसिया कपमा सहभागिता निश्चित भएको हो । एसिया कप आगामी नोभेम्वर र डिसेम्बरमा थाइल्यान्डमा हुनेछ ।
यसअघि आफ्नो चौथो खेलमा शुक्रबार थाइल्यान्डसँग पराजित भएपछि विश्वकपको विश्वस्तरीय छनोटमा सहभागी हुने नेपालको योजना असफल बनेको थियो । तर चीनविरुद्ध भने नेपालले राम्रो प्रदर्शन गर्यो । पहिले ब्याटिङ गरेको चीनले निर्धारित २० ओभरमा सात विकेट गुमाएर ८५ रन बनाएको थियो ।
नेपालले १७.३ ओभरमा ६ विकेटको क्षतिमा लक्ष्य पूरा गर्यो । नेपालको जितमा पूर्वकप्तान नेरी थापाले सर्वाधिक २२ रन बनाइन् । २७ बल सामना गरेकी नेरीले एक चौका प्रहार गरिन् । यसैगरी सीता रानामगरले २०, रुविना क्षेत्रीले अविजित १३ र इन्दु बर्माले १० रन जोडे । बलिङमा चीनकी ऊ जुआन, जोङयुन लु, ली यीङविङ, लिय जी, फेङफेङ सोङले एकएक विकेट लिएका थिए ।
यसअघि चीनका लागि ओपनर फेङफेङ सोङले ३४ रन बनाएकी थिइन् । ओपनर ब्याट्स वुमन जोउ मिएओले १८ तथा चाई उदिनले १० रन बनाएकी थिइन् । अन्य खेलाडीले भने दोहोरो अंकमा रन जोड्न सकेनन् । पहिलो विकेटका लागि ४२ रनको साझेदारी गरेको चीन त्यसपछि भने लगातार दबाबमा आयो । चीनले ८० रन जोड्दा पाँचौं विकेट गुमाएको थियो । बलिङमा नेपालकी रुविना क्षेत्रीले दुई विकेट लिइन् । निर्मलाकुमारी शाही र करुणा भण्डारीले एकएक विकेट लिएका थिए ।
चार ओभरमा केवल १० रन खर्चिएकी रुविना प्लेयर अफ दी म्याच घोषित भइन् । यसैगरी अर्को खेलमा पहिले ब्याटिङ गरेको हङकङले निर्धारित २० ओभरमा सात विकेको क्षतिमा ८३ रन बनाएको थियो । ८४ रनको विजय लक्ष्य थाइल्यान्डले १८.५ ओभरमा तीन विकेट गुमाएर पूरा गर्यो । थाइल्यान्डका लागि सिरिन्ट्रा सेङसाकाओराटले अविजित ३६ रन जोडिन् । सोरनारिन टिपोचले अविजित १७ रन बनाए । बलिङमा हङकङका मारिको हिल, कारलोटी चान र कारी चानले एकएक विकेट लिए ।
हङकङका लागि यस्मिन दस्वानीले अविजित १७ रन बनाइन् । ईमा लीले १६ तथा किनु गिल र मारिको हिलले समान ११÷११ रन जोडे । अन्य खेलाडीले दोहोरो संख्यामा रन बटुल्न सकेनन् । बलिङमा थाइल्यान्डका नाटाया बोचाथाम र सोरनारिन टिपोचले दुईदुई तथा चानिदा सुठिरुवाङ र सुलेप्रोन लाओमीले एकएक विकेट झारे । थाइल्यान्डकी सिरिन्ट्रा सेङसाकाओराट प्लेयर अफ दी म्याच घोषित भइन् । आफ्नो चौथो खेलमा हङकङ शुक्रबार चनसँग पराजित भएको थियो ।
प्रतिक्रिया दिनुहोस !
