समाचार प्रसारण गरेबापत अमेरिकी पत्रकार थुनामा

वासिङटनः संयुक्त राज्य अमेरिकाको नर्थ डकोटा राज्यमा अमेरिकी टेलिभिजन कार्यक्रम ‘डेमोक्रेसी नाउ' की पत्रकार एमी गुडम्यानलाई सोमबार जेल पठाइने भएको छ । दंगा भड्काएको आरोपमा गुडम्यानमाथि मुद्दा चलाइन थालेको हो ।

संसारमा प्रजातन्त्र र मानवअधिकारको पक्षधर दाबी गर्दै आएको अमेरिकामा यस्तो घटना भएको छ । गत सेप्टेम्बरको ३४ तारिखमा अमेरिकी आदिवासीले गरिरहेको विरोध प्रदर्शनको समाचार बनाएकी थिइन् । अमेरिकामा महिनौंदेखि चल्दै आएको आदिवासीको प्रदर्शनलाई त्यसअघि कुनै पनि सञ्चारमाध्यमले प्रसारण गरेका थिएनन् ।

उक्त विरोध प्रदर्शन करिब पौने चार अर्ब डलरको पेट्रोलियम पाइपलाइनको विरोधमा थियो । उक्त पाइपलाइनबाट वातावरणमा खराब असर पर्ने र जलस्रोतका माध्यम प्रदूषित हुने आदिवासीको भनाइ छ । महिनौंदेखि सञ्चारमाध्यमले प्रसारण गर्न नचाहेको उक्त विरोध प्रदर्शन सर्वप्रथम एमी गुडम्यानले कभरेज गरेकी थिइन् ।

उनले यो समाचारलाई विभिन्न कोणबाट प्रसारण गरेकी थिइन् । आदिवासी बसेको क्षेत्रमा बुल्डोजरको जबरजस्ती प्रयोग, त्यस्तो कम्पनीका मानिसले गर्ने पेपर स्प्रे र उनीहरूले सिकारी कुकुर प्रयोग गरी आदिवासी प्रदर्शनकारीलाई लखेट्ने गरेका भिडियो गुडम्यानले ‘डेमोक्रेसी नाउ'मा अपलोड गरेकी थिइन् । त्यसलगत्तै आदिवासीको विरोध प्रदर्शनको समाचार चर्चामा आएको थियो ।

प्रदर्शनका बारेमा आवाज उठ्न थालेपछि अमेरिकी सरकारले पाइपलाइनको काम स्थगित गर्नुपरेको थियो । उक्त विरोधलाई रिपोर्टिङ गरेको भन्दै गुडम्यानमाथि मुद्दा लगाइएको छ । सुरुमा उनलाई आपराधिक घुसपैठ (क्रिमिनल ट्रेसपासिङ) को आरोप लगाइएको थियो । त्यसलाई परिवर्तन गरेर हाल दंगा गर्न उकासेको आोप लगाइएको छ ।

उक्त मुद्दा दर्ता गर्ने वकिल एल एरिक्सनले यस्ता भिडियो प्रसारण गर्ने व्यक्तिलाई सञ्चारकर्मी मान्न नसकिने दाबी गरेका छन् । अमेरिकी पत्रिका ग्र्यान्ड फोक्र्स हेराल्डले लेखेको छ, ‘गुडम्यान प्रदर्शनकारी नै हुन् । उनले गरेको प्रसारणले आदिवासीको विरोध प्रदर्शन उचित भएको दाबी गरेको छ ।' बिस्मार्क ट्रिब्युनले पनि प्रदर्शनकारीको पक्ष लिएको भन्दै उनी दोषी भएको दाबी गरेको छ ।