‘दाहाल -मोदी- सी भेट संयोगवश’
नयाँदिल्लीः ब्रिक्स सम्मेलनको पहिलो दिन शनिबार साँझ गोवामा नेपालका प्रधानमन्त्री पुष्पकमल दाहाल, चीनका राष्ट्रपति सी जिनपिङ र भारतका प्रधानमन्त्री नरेन्द्र मोदीबीचको भेटघाट संयोगवश भएको भारतीय विदेश मन्त्रालयले जनाएको छ ।
भारतीय विदेश मन्त्रालयले ब्रिक्स सम्मेलनबारे जानकारी दिन आइतबार साँझ गोवामा आयोजना गरेको पत्रकारसम्मेलनमा यो भेटघाट संयोगवश भएको जानकारी दिएको हो ।
विदेश मन्त्रालयका प्रवक्ता विकास स्वरूपले भारतीय पत्रकारको जिज्ञासामा अनौपचारिक डिनरका लागि जाने क्रममा एउटै लाउन्ज प्रयोग गर्नुपर्ने अवस्थामा प्रधानमन्त्री दाहाल र चिनियाँ राष्ट्रपति सी जिनपिङसँग कुराकानी भइरहेको र सोही बाटो भएर प्रधानमन्त्री नरेन्द्र मोदी पनि विभिन्न नेताहरूका साथ कुराकानी गर्दै आइरहेको हुँदा लिडरर्स लाउन्जमा सामान्य भेटघाट भएको स्पष्ट पारे ।
त्रिपक्षीय वार्ता भनेर आइरहेको समाचारको खण्डन गर्दै उनले भने, चीन र नेपालबीच द्विपक्षीय वार्ता सम्पन्न भइसकेको अवस्थामा यो भेट कसरी त्रिपक्षीय भयो ? ' भारतको चीन र नेपाल दुवै राष्ट्रसँग सुदृढ सम्बन्ध रहेको हुँदा एउटै कोठामा तीनै देशका प्रमुखको भेटमा कुराकानी हुनु सामान्य रहेको प्रवक्ता स्वरूपले स्पष्ट पारे ।
विदेश मन्त्रालयले शनिबार रातिसम्म यो भेटबारे औपचारिक पुष्टि नगरेका कारण भारतीय सञ्चारमाध्यमले यो खबर नछापेको सम्मेलनमा संलग्न एक पत्रकारले बताए । सामाजिक सञ्जालमा नेपालका प्रधानमन्त्रीका स्वकीय सचिव तथा पुत्र प्रकाश दाहालले त्रिपक्षीय भेटको जानकारी तथा फोटो पोस्ट गरेपछि यो खबर भारतीय अनलाइन खबरमा प्रकाशित भएका थिए ।
आइतबार प्रकाशित भारतीय दैनिक पत्रपत्रिकामा यो खबरको कुनै चर्चा थिएन । स्वकीय सचिव दाहालको फेसबुकबाट साभार गरेर आइतबार दिउँसो तीन बजेपछि केही भारतीय अनलाइन खबरले यो समाचार प्रकाशित गरे ।
भारतीय समाचार एजेन्सी प्रेस ट्रस्ट इन्डिया (पीटीआई) ले नेपालबाट प्रकाशित हुने अंग्रेजी दैनिक दि हिमालयन टाइम्सलाई उद्धृत गरी साँझ साढे चार बजेपछि नेपाल भारत र चीनको बीचमा गतिशील पुल बन्न चाहेको शीर्षकमा समाचार प्रकाशित गरेको छ भने पीटीआईकै समाचारलाई इकोनोमिक टाइम्स, इन्डिया टुडेलगायतले छापेका छन् ।
केही सञ्चारमाध्यमले भने प्रकाश दाहालको फेसबुकलाई उद्धृत गर्दै समाचार प्रकाशित गरे । भारतीय पत्रिका द हिन्दु अनलाइन र हिन्दुस्तान टाइम्सले दिउँसो तीन बजेपछि क्रमशः मोदी, दाहाल, सी अनौपचारिक भेटघाट र चीन र नेपालको द्विपक्षीय भेट मोदीको प्रवेशपछि त्रिपक्षीय सत्रमा परिणत भन्ने शीर्षकमा समाचार प्रकाशित गरेको थियो ।
प्रतिक्रिया दिनुहोस !
