दसैंमा पनि बाँडिएन सामाजिक सुरक्षा भत्ता

राजविराजः दसैंअगावै पाउनुपर्ने सामाजिक सुरक्षा भत्ता हालसम्म वितरण नहुँदा जेष्ठ नागरिक र एकल महिलाहरूले चाडबाड मनाउन पाएनन् ।

चाडपर्वका बेला राम्रो लुगा किन्ने, मिठो खाने र घरखर्चका लागि सामान किन्न नपाउँदा दसैं खल्लो भएको राजविराजका वृद्धवृद्धा र एकल महिलाले गुनासो गरेका छन् । सामाजिक सुरक्षा भत्ताबापतको रकम सम्बन्धित नगरपालिकामा पुगे पनि कार्यालय प्रमुख नहुँदा वितरण हुन नसकेपछि सामाजिक सुरक्षा भत्ता लिँदै आएकाहरूको दसैं खल्लो भएको हो ।

सामाजिक सुरक्षा कार्यक्रम सञ्चालन कार्यविधि ०७२ अनुरूप नगरपालिकाको खातामा भत्ताको अख्तियारीसहित एक करोड १० लाख ९७ हजार रकम आए पनि कर्मचारीको गैरजिम्मेवारी पनका कारण रकम वितरण हुन नसकेको हो ।

दसैंमा समेत जिम्मेवार निकायबाट सामाजिक सुरक्षा भत्ताको रकम निकासा हुन नसकेका कारण रकम वितरण गर्न नसकिएको सम्बन्धित नगरपालिकाले जनाएका छन् । तत्कालीन कार्यालय प्रमुख विष्णु गुरुङ चेकमा हस्ताक्षर नगरी सरुवा भएर असोज १७ गते प्युठान गएकाले रकम वितरण गर्न नसकिएको निमित्त कार्यालय प्रमुख हरिनारायण राम रौनियारले बताए ।

दसंैको अवसरमा सुरक्षा भत्ता नपाउँदा जेष्ठ नागरिक, एकल महिलाको दसैं खल्लो भएको कार्यालयका शाखा अधिकृत प्रफुल्ल श्रेष्ठले बताए । राजविराज नगरपालिकाबाट अपांग, जेष्ठ नागरिक, एकल महिला र दलित बालबालिकासमेत गरी एक हजार सात सय २२ जनाले सामाजिक सुरक्षा भत्ता लिँदै आएका छन् ।

सरकारले भत्ता दोब्बर बनाएको सुनेका आंशिक अपांग एवं दलित जोगिन्दर मरिकले दसैंमा नयाँ कपडा किन्न नसकेको बताए । सामाजिक सुरक्षा भत्ताको आसमा बसेका मरिकले चौमासिक भत्ता नपाएपछि पुरानै कपडा लाएर दसैं मनाएको बताए ।

ऋणमा दसैं बिताएकी राजविराज ७ की रामप्यारी बेलदारलाई अहिले तिहार कसरी मनाउने भन्ने चिन्ताले पिरोलेको छ । बिहानबेलुका छाक टार्न पनि समस्या भएको बताउने राजविराज ६ की खैकीदेवी र राजविराज ७ की पूर्ण अपांग रञ्जु रजकको घरमा रासन पनि सकिँदै गएको छ ।

सरकारले दिने सामाजिक सुरक्षा भत्ताबापतको रकमले चाडपर्वमा नयाँ कपडा किन्ने, मिठोमसिनो खाने र अन्य गर्जो टार्ने जेष्ठ नागरिक र एकल महिलाको योजना कर्मचारीको गैरजिम्मेवारीपनाले पूरा हुन नसकेको राजविराज ९ का शम्भु देवले बताए ।

भत्ता पाउने आसमा दैनिक कार्यालय धाउने वृद्धवृद्धालाई रित्तो हात घर फर्काउनु पर्दा भत्ता विरणको अख्तियारी पाएका पञ्जिकाधिकारी लोकेन्द्र चौधरीले आफैंलाई दुःख लागेको बताए ।