तिहार अघि कांग्रेसबाट आठ राज्य मन्त्री

काठमाडौः पटक पटक कांग्रेसको अनिर्णयका कारण टरेको राज्यमन्त्री नियुक्ति तिहार अघिनै हुने भएको छ । कांग्रेसले तिहार अघिनै राज्यमन्त्री पठाउने छ । प्रधानमन्त्री पुष्पकमल दाहाल र कांग्रेस सभापति शेरबहादुर देउवाबीच मंगलबार साँझ कुराकानी भएपछि तिहार अघिनै कांग्रेसकातर्फबाट ८ जना राज्यमन्त्रीसहित साना दल र मधेसी जनअधिकार फोरम लोकतान्त्रिकलाई सरकारमा सहभागी गराउने सहमति भएको हो ।

फोरम लोकतान्त्रिक र साना दलका लागि प्रधानन्त्री दाहालले महिला बालबालिका तथा समाज कल्याण, खानेपानी तथा सरसफाई, पशुपंक्षी विकास र विज्ञान तथा प्रविधि मन्त्रालय आफूसँगै राखेका छन् । स्रोतका अनुसार देउवा र दाहालबीच छलफल भएपछि चार मध्ये दुई फोरम लोकतान्त्रिकलाई दिने सहमति भएको हो । बाँकी दुई मन्त्रालय भने साना दललाई दिन लागिएको छ ।

त्यसैगरी नयाँ चार मन्त्रीसँगै कांग्रेसले आठजना राज्यमन्त्री पनि पठाउने तयारी गरेको छ । बिहीबार र शुक्रबार पार्टीको केन्द्रीय समितिको बैठक डाकेकाले सोमबारसम्ममा कांग्रेसका राज्य मन्त्रीलाई शपथ खुवाउने तयारी छ ।

पदाधिकारी मनोनयन तरुण दलको अधिवेशनपछि

कांग्रेस सभापतिले उपसभापति, महामन्त्री र सहमहामन्त्रीको मनोनयन भने कात्तिक अन्तिमा हुने तरुण दलको महाधिवेशन पछि गर्ने भएका छन् । तिहारलगत्तै सभापति देउवाको विदेश भ्रमण हुने र त्यही समय तरुण दलको अधिवेशन भएकाले मंसिर पहिलो साता मात्रै पदाधिकारी मनोनयन हुने स्रोतको दाबी छ ।

देउवा निकट स्रोतका अनुसार उपसभापतिमा गोपालमान श्रेष्ठ मुख्य दावेदार हुन् । त्यस्तै नेता खुमबहादुर खड्का र उपप्रधान एवं गृहमन्त्री विमलेन्द्र निधिले पनि उपसभापतिमा आकांक्षा राखेका छन् ।
त्यसैगरी महामन्त्रीमा भने २०३८ सालाका नेविसंघका अध्यक्ष ज्ञानेन्द्रबहादुर कार्कीलाई बनाउने निश्चित जस्तै छ । सहमहामन्त्रीमा भने कसलाई बनाउने टुंगो लागेको छैन । सहमहामन्त्रीमा मानबहादुर विश्वकर्मा, महेश आचार्य, आनन्दप्रसाद ढुंगानालगायतले दाबी गरेका छन् ।

देउवाले पदाधिकारीसँगै पार्टीको केन्द्रीय विभागको पनि गठन गर्ने तयारी गरेका छन् । कांग्रेस विधानमा ४० वटा विभागको व्यवस्था छ । विभाग गठनका लागि देउवाले केन्द्रीय सदस्यसँग आफूलाई इच्छा भएको विभागका प्राथमिकता तोकेर चारवटा विभागको नाम मागेका छन् । सोहीअनुसार सदस्यको क्षमता र अनुभवका आधारमा विभागको प्रमुख बनाउने तयारीमा देउवा छन् ।

कांग्रेसले समसामयिक राजनीतिक अवस्था, सविधान संशोधनलगायतका विषयमा छलफल गर्न केन्द्रीय कार्यसमितिको बैठक डाकेको छ । बिहीबार पार्टी केन्द्र कार्यालय सानेपामा डाकिएको बैठकमा संविधान संशोधनमा लागि नागरिकता, भाषा, राष्ट्रिय सभाको गठन र प्रदेश सिमांकन र स्थानीय निकायको पुर्नसंरचनाका विषयमा छलफल हुने बताइएको छ ।

कांग्रेसले स्थानीय नियकाको संरचना यसअघिका इलाकालाई नै गाउँपालिका बनाउनुपर्ने धारणा अघि सार्दै आएको छ । चैत मसान्तसम्म स्थानीय निकायको चुनाव गर्नेपर्ने भएकाले पनि कांग्रेसले स्थानीय तहको विषयमा औपचारिक धारणा बनाउन लागेको हो ।