प्रभावकारी भएन अनुगमन 

धादिङः सरकारले बजार अनुगमन तीव्र पारेको भए पनि धादिङमा गरिएको अनुगमन भने प्रभावकारी नभएको उपभोक्ता र व्यापारीले बताएका छन् ।

 चाडपर्वको मौका छोपी बिचौलियाहरू सल्बलाएका कारण त्यसको प्रत्यक्ष मार उपभोक्ताहरूले बेहोर्दै आएका छन् । महंगी र कालोबजारी नियन्त्रण गर्न भन्दै पछिल्लो समय सदरमुकाम र पृथ्बी राजमार्गका होटेल, स्वास्थ्य संस्था तथा किराना पसलमा अनुगमन तीव्र पारेको स्थानीय प्रशासनले व्यवसायी कागजपत्र मात्र हेर्ने गरेको स्थानीयको गुनासो छ ।

 पछिल्लो समय जिल्ला प्रशासन कार्यालय धादिङलगायत विषयगत कार्यलयहरू, गुणस्तर तथा नापतौल विभाग, वाणिज्य विभागलगायतले छुट्टाछुट्टै रूपमा धादिङबेसी र पृथ्बी राजमार्गमा व्यापार व्यवसाय सञ्चालन भइरहेका विभिन्न ठाउँहरूमा एक दर्जनभन्दा बढी पटक अनुमगन ग¥यो ।

कालोबजारी र महंगी बढेको भन्दै अनुगमन भए पनि न कालो बजारी गर्ने व्यापारी पक्राउ परे न महंगी नै नियन्त्रण भयो । म्याद सकिएका केही खाद्य सामग्री जफत गर्नु र दर्ताबिना नै व्यावसाय सञ्चालन गरिरहेकालाई ७ दिने म्याद दिनुबाहेक अनुगमन खासै प्रभावकारी बन्न नसकेको उपभोक्ताले आरोप लगाएका छन् ।

 अनुगमन तीव्र बनाएपछि केही सुधार भए पनि जति प्रभाव पर्नुपथ्र्यो त्यो नपरेको धादिङ जोगिमाराका रामबहादुर श्रेष्ठले बताए । अनुगमन सानातिना व्यापार व्यवसाय गर्नेहरूमाथि मात्रै हुने गरेको गुनासो आउन थालेको छ । विशेष गरी स्वास्थ्य संस्था पेट्रोल पम्प, मासु पसललगायत सदरमुकामका ठूला होटेल र खाद्यान्न स्टोरहरूमा अनुगमनको कुनै प्रभाव पर्ने गरेको छैन ।

मौसमी अनुगमनले कुनै परिवर्तन ल्याउन नसक्ने उपभोक्ता अधिकारकर्मी राजेन्द्र बस्नेतले बताए । स्थानीय प्रशासनले उपभोक्ताको हितमा भन्दा पनि मन्त्रालय र विभागको नियमित कामकाजको रिपोर्ट बनाउन मात्रै अनुगमन गर्ने गरेको उपभोक्ताले आरोप लगाए ।

अनुगमनका नाउँमा अधिकांश पसलमा काजगपत्र मात्रै चेकजाँच गर्ने गरेको स्वयं व्यापारी बताउँछन् ।

धादिङबेसीका व्यापारी शान्तविक्रम बानियाँले भने, ‘नियमित रूपमा प्रभावकारी अनुगमन हुने हो भने धेरै कुराहरूमा सुधार आउँछ तर यहाँ त कसैलाई देखाउनका लागि मात्रै अनुगमन हुन्छ ।'

अनुगमनका क्रममा कानुनसम्मत नदेखिएका व्यापार व्यवसाय त्यतिखेर बन्द गर्ने गरेको भए पनि अनुगमन टोली फर्केको केही घन्टामा पुनः सञ्चालन हुने गरेको छ ।

स्थानीय प्रशासन भने आफूहरूले अनुगमन प्रभावकारी तरिकारले गरेको दाबी गर्दै आएको छ ।

जिल्ला प्रशासन कार्यालयले मात्र नभई विषयगत कार्यालयहरूले पनि समय समयमा आफ्नो कार्यक्षेत्रका व्यापार व्यवसायहरूमा अनुगमन गर्दै लापरबाही गर्नेहरूलाई कारबाही गरिरहेको दाबी गरेको छ ।

सहायक प्रमुख जिल्ला अधिकारी एवं जिल्ला अनुगमन अधिकृत लीलाधर अधिकारीले भने, ‘पछिल्लो समयमा अनुगमन गर्ने कामलाई तीव्रता दिएका छौँ, विषयगत कार्यालयहरूले पनि आफ्नै तरिकाले अनुगमन र चेकजाँचका काम गरिरहेका छन् ।

केही प्रगति नभएको भन्न मिल्दैन । अनुगमन भएकै कारण राजमार्गका होटेलदेखि अन्य व्यापार व्यवसायमा धेरै सुधार हुँदै आएको छ । तर, ८६ किलोमिटर रहेको पृथ्बी राजमार्गका होटेलहरू नियन्त्रण गर्न अहिलेको अनुगमन मात्रै पर्याप्त छैन ।'