काठमाडौः भुसाल ग्रुपअन्तर्गतको न्यू होल्यान्ड एग्रिकल्चरले बुधबार ललितपुर सातदोवाटोमा भुसाल ट्रयाक्टर सप्लायर्सको कर्पोरेट अफिससहितको सोरुम स्थापना गरेको छ ।
तराइ, पहाड, हिमाल, न्यू-होल्यान्डको कमाल भन्ने नाराका साथ विश्व विजेता न्यू होल्यान्ड एग्रिकल्चरले विभिन्न मोडलका नयाँ ट्रयाक्टर नेपाली बजारमा भित्र्याएको छ । बुटवललाई आधार क्षेत्र बनाएर ट्रयाक्टरको कारोबार सुरु गरेको ग्रुपले बुधबारबाट सातदोवाटोमा नयाँ सोरुम सञ्चालनमा ल्याएको हो ।
कम्पनीले ३० देखि ९० हर्षपावरका नयाँ मोडल र प्रविधियुक्त ट्रयाक्टरको विक्री सुरु गरेको हो । ती ट्रयाक्टर ढुवानी र खेतबारी जोत्नका लागि निकै उपयोगि रहेको कम्पनीको दावी छ ।
डिजेल कम खपत गर्ने केस ब्राण्डका ट्रयाक्टर नेपाली किसानलाई लक्षित गरी निर्माण गरिएको नेपालस्थित आधिकारिक विक्रेता भूसाल ट्रयाक्टर सप्लायर्सका सञ्चालक बालकृष्ण भुसालले बताएका छन् । उनले टर्कीको प्रविधिमा निर्माण गरिएका ट्रयाक्टर नेपाली किसानले मन पराएको बताए ।
बुटवलबाट विक्री सुरु गरिएको केस ब्राण्डका विभिन्न मोडलका ट्रयाक्टरको बुकिङ सुरु भइसकेको कम्पनीले जानकारी दियो । देशैभरीबाट माग आइरहेकाले न्यू होल्यान्डका ट्रयाक्टर नेपाली बजारमा ३० प्रतिशत पुर्याउने लक्ष्यप्राप्तीमा कुनै कठिनाइ नहुने उनले बताए ।
कम्पनीले ट्रयाक्टरको खरिदमा तीन वर्षको वारेन्टी र सातवर्षसम्म निःशुल्क सर्भिसिङको व्यवस्था गरेको छ । पार्टसको विक्री वितरण भने रामकृष्ण टेड सेन्टरमार्फत हुने कम्पनीले जानकारी दिएको छ ।
प्रतिक्रिया दिनुहोस !
