कांग्रेस बैठकमा देउवाले भने, अख्तियारलाई लोकमानले शाही आयोगजस्तै बनाए

काठमाडौं : कांग्रेसको सभापति शेरबहादुर देउवाले लोकमानले अख्तियारलाई शाही आयोगजस्तो बनाएर स्वेच्छाचारी ढंगले काम गरेकोले महाअभियोग ल्याउनुपर्ने अवस्था आएको बताएका छन् ।

बिहीबारदेखि सुरु भएको कांग्रेस केन्द्रिय समितिको बैठकलाई सम्बोधन गर्दै उनले यस्तो धारणा राखेका हुन् । उनले महाअभियोग ल्याउनुभन्दा अघि एमाओवादी र एमाले नेतृत्वसँग अनौपचारिक छलफल भएको पनि स्वीकार गरेका छन् ।

बैठकमा कांग्रेसका सदस्यहरुले एमाले र एमाओवादीले एकलौटी रुपमा महाअभियोग दर्ता गराएको र कांग्रेसको भूमिका र दृष्टिकोणबारे अनेक आशंका भइरहेको भन्दै देउवासँग जवाफ मागेपछि उनले स्पष्ट पारेका थिए । उनले कांग्रेस महाअभियोगको पक्षमा उभिने स्पष्ट संकेत दिएका थिए ।
बैठकमा सहभागी कांग्रेस सदस्य गोविन्द भट्टराईले देउवाको भनाइ उधृत गर्दै भने, 'शाही आयोगले जस्तो सबैलाई थर्काउने र धम्काउने लोकमानको स्वेच्छाचारी शैलीका कारण आज यस्तो अवस्था आएको हो ।'

बैठकमा बोल्ने अधिकांशले महाअभियोग पक्षमा उभिनुपर्ने बताए पनि केहीले कांग्रेससँग सहमति र छलफल नभइकन ल्याएको भन्दै असन्तुष्टी जनाएका थिए । कांग्रेस बैठक शुक्रबार ११ बजेदेखि पुनः बस्नेछ ।