भवानी राणा अध्यक्ष बन्ने निश्चित

काठमाडौः नेपाल उद्योग वाणिज्य महासंघको आगामी अध्यक्ष भवानी राणा बन्ने निश्चित भएको छ । वरिष्ठ उपाध्यक्ष स्वतः अध्यक्ष बन्न पाउने प्रावधानसहितको संशोधित विधान पारित भएपछि उनी बिना प्रतिस्पर्धा अध्यक्ष बन्ने भएकी हुन् । उनी अहिले महासंघको वरिष्ठ उपाध्यक्ष छन् ।

आर्मी अफिसर्स क्लवमा बिहीबार सम्पन्न विशेष साधारणसभाले विधान संशोधन प्रस्ताव पारित गरेको हो । विशेष साधरणसभामा सहभागी ९० प्रतिशतभन्दा बढी सदस्य विधान संशोधनको पक्षमा देखिए । संशोधित विधान छिट्टै कार्यान्वयनमा आउने महासंघ अध्यक्ष पशुपति मुरारकाले जानकारी दिए । ‘संशोधित विधान प्रमाणीकरणका लागि जिल्ला प्रशासन कार्यालयमा पठाउँछौं, प्रमाणीकरण भएलगत्तै नयाँ विधान कार्यान्वयन हुन्छ’, उनले भने ।

महासंघको आगामी चैतमा नयाँ कार्यसमितिको निर्वाचन हुँदैछ । ‘चैतमा हुने निर्वाचनमा अध्यक्ष बाहेक अन्य पदमा मात्र निर्वाचन हुन्छ’, मुरारकाले भने, ‘वरिष्ठ उपाध्यक्ष महासंघको स्वतः अध्यक्ष बन्नेछन् ।’ यो व्यवस्थाले वरिष्ठ उपाध्यक्ष राणा महासंघको नेतृत्वमा सजिलै पुग्ने भइन् । उनले महासंघको नेतृत्व सम्हाल्ने पहिलो महिला बन्ने सौभाग्य पाउने भएकी छन् ।

अहिलेसम्म महासंघको अध्यक्ष, तीन उपाध्यक्ष र कार्यकारिणी सदस्यमा निर्वाचन हुँदै आएको थियो । वरिष्ठ उपाध्यक्ष भने निर्वाचित कार्यकारिणी समितिबाट चयन गरिन्थ्यो । अब अध्यक्षमा निर्वाचन नहुने भएपछि वरिष्ठ उपाध्यक्षको निर्वाचन प्रतिस्पर्धी बन्ने देखिएको छ । वरिष्ठ उपाध्यक्ष र तलका सबै पदमा निर्वाचन हुनेछ ।

विशेष साधारणसभामा सहभागी ९० प्रतिशतभन्दा बढी सदस्य विधान संशोधनको पक्षमा देखिए । 

संशोधित विधानमा कोषाध्यक्ष पदको पनि व्यवस्था गरिएको छ । अहिलेसम्म महासंघमा कोषाध्यक्ष पद थिएन । कार्यकारिणी समितिले निर्वाचित सदस्यमध्ये एक जनालाई कोषाध्यक्ष चयन गर्नेछ । महासंघको कार्यकारिणी समितिमा पाँच जना थपेर ७१ पुर्‍याइएको छ ।

महासंघको विधान संघीय संरचना सुहउँदो संशोधन गरिएको मुरारकाले बताए । नयाँ विधानअनुसार प्रत्येक प्रदेशमा महासंघको प्रदेश एकाइ रहनेछ । सातवटै प्रदेशका एकाईमा छुट्टै अध्यक्ष रहनेछन् । सम्बन्धित प्रदेशले नै आफ्नो प्रमुख छान्नेछ । प्रदेश प्रादेशिक अध्यक्ष केन्द्रमा कार्यकारिणी सदस्यका रूपमा रहने व्यवस्था गरिएको छ । नयाँ विधानमा अञ्चल प्रतिनिधि खारेज गरिएको छ । संघीय संरचनामा अञ्चल नरहने भएपछि अञ्चल प्रतिनिधि खारेज गरिएको उनले जानकारी दिए ।

पूर्वअध्यक्षको बहिष्कार

महासंघका धेरैजसो पूर्वअध्यक्षले साधारणसभा बहिष्कार गरे । उनीहरूको उपस्थिति बिना विधान संशोधन गरिएको हो । महासंघका पूर्वअध्यक्ष महेश्वरलाल प्रधान, पद्य ज्योति, आनन्दराज मुल्मी, विनोदबहादुर श्रेष्ठ, कुशकुमार जोशीले आफूहरूलाई निमन्त्रणा नआएको बताउँदै बुधबार साँझ संयुक्त विज्ञप्ति जारी गरी साधारणसभा बहिष्कार गरेको घोषणा गरेका थिए । अर्का पूर्वअध्यक्ष सुरज वैद्य अहिले देशबाहिर छन् । उनी पनि असन्तुष्ट पक्षका हुन् । तर, महासंघ सचिवालयले सबै पूर्वअध्यक्षलाई चिठी पठाएर भरपाई बुझेको दाबी गरेको छ ।

विशेष साधारणसभामा पूर्वअध्यक्ष रविभक्त श्रेष्ठ र चण्डिराज ढकालमात्र उपस्थित थिए । ढकाल विधान संशोधन समितिको सभापति समेत थिए । यसअघि ढकालकै कार्यकालमा विशेष साधारणसभामार्फत महासंघको विधान संशोधन गरेर दुई वर्षे कार्यकाललाई तीन वर्षको बनाइएको थियो । राणालाई अध्यक्ष बनाउन कस्सिएर लागेका ढकाल सहजै नेतृत्वमा पुर्‍याउन सफल भएका छन् ।

विधान संशोधन गर्न विशेष साधारणसभा डाकेपछि पूर्ववरिष्ठ उपाध्यक्ष भाष्करराज राजकर्णिकार र कार्यकारिणी सदस्य गोविन्दराज घिमिरेले यसलाई रोक्न उच्च अदालत पाटनमा रिट हालेका थिए ।

अदालतले मंगलबार विशेष साधारणसभा यथास्थितिमा राख्न अन्तरिम आदेश जारी गर्दै बुधबार दुवै पक्षलाई बोलाएर राय लिएको थियो । दुवै पक्षको राय लिएपछि अदालते अन्तरिम आदेशलाई निरन्तरता दिनु नपर्ने निष्कर्ष निकाल्दै रिट खारेज गरेर विशेष साधारणसभाको बाटो खोलिदिएको थियो ।