सिर्जनशील बन्यो यसपालिको दसैं
वर्षभरीको सबैभन्दा लामो छुट्टि दशैँ सबैले एकैनासले बिताउँदैनन् । दशैँका लागि आ-आफ्नै हिसाबले योजना बनाएका हुन्छन् । सिर्जनशीलहरूका लागि दशैँ नयाँ सिर्जना गर्ने सुनौलो मौका पनि हो ।
लेखक खगेन्द्र लामिछाने हरेक वर्ष दशैँमा स्याङ्जास्थित घर जान्छन् । हरेक दसैंमा उनी केही न केही नयाँ सिर्जना लिएर फर्कन्छन् । यसपाली घर गएका लामिछानेको टिका थिएन । दशैँको फुर्सदिलो समयलाई उनले चलचित्र ‘धनपति' लेखनमा खर्चिए । चलचित्रको ‘सेमिफाइनल ड्राफ्ट' दशैँभरीमा पुरा भयो ।
खानपान र डुल्नुमा भन्दा घरकै काममा व्यस्त रहन उनलाई मन पर्छ । भन्छन्, ‘सबैको आ आफ्नै रुची हुन्छ, लेखन कार्य नभएको बेलामा घर व्यवस्थापनमा भुल्छु ।' उनलाई घरकै सुन्तलाको बगैँचा स्याहार्न रमाइलो लाग्छ ।
रंंगकर्मी सृजना सुब्बाको दशैँ यसपाली अरु बेलाको भन्दा विशेष बन्यो । दशैँमा परिवारमा नयाँ सदस्यको आगमन भयो । भाइको सन्तान जन्मिएकाले पुरै परिवारले उल्लासपूर्ण दशैँ मनाए । भनिन्, ‘भाइको बच्चा हाम्रो लागि विशेष गिफ्ट भयो ।' उनीहरुको टिका लगाउने चलन छैन ।
तर आफन्त भेटघाटले दशैँलाई निकै रमाइलो बनाउने गर्छ । यसपटक सानो बच्चाकै कारण घरमा पाहुनाको आवतजावत अरु समयमा भन्दा बढि थियो । भन्छिन्, ‘सबै आफ्नै संसारमा व्यस्त हुन थालेका छन्, दशैँमा त बिर्सिसकेको मान्छेहरु पनि भेट भयो, त्यहि नै सबैभन्दा रमाइलो पक्ष बन्यो ।'
अर्का रंगकर्मी राज शाहको दशैँ झनै विशेष बनेछ । ‘काठमाडौँ खाल्डोको दशैँ कस्तो हुनु र ? ' भन्दै दशैँको एक दिन पनि खेर फालेनछन् । कामको बोझले धेरै दौडधुप भइरहको समयमा दशैँले आराम गर्ने मौका दियो । यो समय पुस्तक पढेरै बिताएछन् । ‘ऐना', ‘हारी', ‘फुलानी', कथासंग्रह, केहि नाटकहरु पढे । केहि छुटेका चलचित्र हेरे ।
लेख्दै गरेको नाटकलाई पनि यहि मौकामा बिट मारे । काठमाडौँमा बस्दैमा दशैँ नरमाइलो त के हुन्थ्यो र । राजले भक्तपुर, खोकना, हाँडी गाउँ र पाटनका जात्रा हेरे । भने, ‘जात्रामा जान खुब मन पर्छ, यी चार ठाउँको जात्रा चाहिँ छुटाउनै हुन्न ।' काठमाडौँको सबैभन्दा राम्रो पक्ष भनेकै यस्तै साँस्कृतिक क्रियाकलाप हुन् ।
अभिनेत्री वर्षा राउतको दशैँ पनि रमाइलो बितेछ । उनी यसपाली कजन दाजुको बिहेको रमझममा दशैँ बित्यो । सधैँ दशैँमा चँगा उडाउने, तास खेलेर रमाइलो गर्ने गर्थिन् । तासमा जुटपत्ती भन्दा अरु खेल्न जान्दिनन् । यसपाली बिहेकै चटारोले तास पनि त्यति खेलिनन् ।
प्रतिक्रिया दिनुहोस !
