हिन्दु अधिराज्यको माग गर्दै पाँच बुँदे घोषणापत्र सार्वजनिक
काठमाडौंः विश्व हिन्दु महासंघले नेपाललाई तत्काल हिन्दु अधिराज्य घोषणा गर्न माग गरेको छ । तीन दिने अन्तर्राष्ट्रिय विराट हिन्दु महासम्मेलनको तेस्रो तथा अन्तिम दिन शनिबार पाँच बुँदे घोषणापत्र जारी गर्दै यस्तो माग गरेको हो ।
महासंघका नवनिर्वाचित भरतकेसर सिंहले विश्वको एकमात्र हिन्दु अधिराज्य नेपाललाई बलपूर्वक धर्म निरपेक्ष राष्ट्र घोषणा र राजसंस्थालाई विस्थापित गर्ने कार्य एकसाथ गरिएको कार्यलाई महासम्मेलन घोर विरोध गर्दै नेपाललाई तत्काल हिन्दु अधिराज्य घोषणा गर्नुपर्ने बताए ।
उनले भने, ‘संविधानतः धर्म निरपेक्ष राज्यको घोषणालाई तत्काल खारेज गरी हिन्दु अधिराज्य पुनः कायम गर्न सरकार र अन्तर्राष्ट्रिय जगत समेतको ध्यानाकर्षण गर्दछौं ।’ ९४ प्रतिशत ओमकार परिवारको भावना कदर नभए सशक्त आन्दोलन गर्ने चेतावनी पनि उनले दिए ।
सम्मेलनमा जारी घोषणा पत्रमा वैदिक सनातन हिन्दु धर्मबाट इतर धर्ममा प्रवेश गरिसकेकालाई पुनः आफ्नो धर्ममा फिर्ता ल्याउन विश्वका सम्पूर्ण ओमकार परिवार संगठित भई कदम चाल्न पनि आग्रह गरिएको छ । नेपाल धर्म निरपेक्ष घोषणा भएपछि गौवंश सुरक्षित नभएको तथ्यलाई ह्दयंगम गर्दै गौवंश संरक्षणका लागि अभियान सञ्चालन गर्न पनि आग्रह गरिएको छ ।
कात्तिक ४, ५ र ६ गते राजधानीमा भएको महासम्मेलनको पूर्वराजा ज्ञानेन्द्रले उद्घाटन गरेका थिए । महासम्मेलनमा पूर्वरानी कोमलको पनि उपस्थिति थियो ।
पत्रमा हिन्दु सम्राट ज्ञानेन्द्र र हिन्दु साम्राज्ञी कोमल महासम्मेलनमा आई उद्घाटन गरेकोमा कृतज्ञतासहित धन्यवाद व्यक्त गरिएको छ । महासम्मेलनमा थाइल्याण्ड, अमेरिका, नेपाल, भारत, बंगलादेश, पाकिस्तान, नेदरल्याण्ड, अष्ट्रेलिया लगायतका देशको सहभागिता थियो।
प्रतिक्रिया दिनुहोस !
