काठमाडौं: अख्तियार दुरुपयोग अनुसन्धान आयोगका कार्यवाहक प्रमुख आयुक्त दीप बस्न्यातले नेतृत्वविरुद्धको महाभियोगले आयोगलाई आहत बनाएको बताएका छन् । उनले संवैधानिक दायित्व र कार्यसम्पादनबाट अख्तियार विचलित नहुने भनाइ पनि राखेका छन् । आयोगका कर्मचारीलाई आइतबार निर्देशन दिँदै बस्न्यातले भने, 'संसद्ले गर्ने निर्णय सबैका लागि शिरोधार्य हुन्छ ।'
'आयोग एउटा जीवन्त संस्था भएकाले निश्चित घटनाविशेषका आधारमा आयोगलाई प्राप्त संवैधानिक दायित्व र कार्यसम्पादनको प्रभावकारितामा विचलन आउँदैन', उनले भने ।
आयोग नेतृत्वविरुद्धको प्रस्तावले संसद्मा प्रवेश पाइसकेको हुँदा उक्त प्रकरण संवैधानिक प्रक्रियाबाटै निरूपण हुने र संसद्को निर्णय सबैका लागि शिरोधार्य हुने बस्न्यातको भनाइ थियो ।
उनले आयोगका कर्मचारीलाई संवेदनशील भएर आयोगको मर्यादा र छवि उचो राख्ने गरी कार्यसम्पादन गर्न सुझाव दिए । अख्तियार प्रवक्ता गणेश कार्कीका अनुसार उजुरीमा सरोकार राख्ने जोकसैलाई दुःख र हैरानी नदिई सम्मानजनक व्यवहार गर्न पनि कर्मचारीलाई सुझाव दिइएको थियो ।
आयोगको अनुसन्धान प्रक्रिया र गोपनीयताको विषय संवेदनशील हुने भएकाले त्यसप्रति जिम्मेवार रहन र आयोगको आधिकारिक धारणा प्रवक्तामार्फत सार्वजनिक गर्न पनि बस्न्यातले सजग गराए ।
उनले आयोगमा परेका उजुरीसँग सरोकार राख्ने जोकसैलाई दुःख नदिने र अनुसन्धानको दायरामा आएका सबैमाथि सम्मानजनक व्यवहार गर्नसमेत निर्देशन दिएका छन् ।
प्रतिक्रिया दिनुहोस !
