काठमाडौं: शंखमूलमा चोरी गर्दागर्दै प्रहरीले चोर पक्राउ गरेको छ । आइतबार अपराह्न स्थानीय भरत शाक्यको घरको मूलढोका फोरेर भित्र छिरी धमाधम चोरी गर्दा प्रहरीको क्विक रेस्पोन्स टिम (क्यूआरटी) ले दोलखाका रमेश श्रेष्ठलाई समातेको हो ।
महानगरीय प्रहरी वृत्त बानेश्वरका प्रमुख डीएसपी नारायण चिमोरियाका अनुसार श्रेष्ठ शाक्यको घरमा कोही नभएको मौका छोपी मूलढोका फुटाएर भित्र पसेका थिए । प्रहरी आएको सूचना पाएपछि भाग्न खोज्दा उनी पक्राउ परेका हुन् । प्रहरीले श्रेष्ठबाट लागूपदार्थ खैरो हेरोइन, ढोका फोड्न प्रयोग हुने फलामे औजार, चोरीको मोबाइल र सुनको मुन्द्रा बरामद गरेको छ । प्रहरीको प्रारम्भिक अनुसन्धानबाट श्रेष्ठ उपत्यकामा भएको शृंखलाबद्ध चोरीका घटनामा संलग्न फरार अभियुक्त हुन् । प्रहरीले ठूलै समूह भएको आशंकामा अनुसन्धान अगाडि बढाएको छ ।
चिमोरियाका अनुसार श्रेष्ठ एक वर्षदेखि चोरीका घटनामा संलग्न रहेको उनी स्वयंले बयान दिएका छन् । 'राजधानीका पुरानोबानेश्वर, जडीबुटी, स्वयम्भू, गोंगबु, पेप्सीकोला, पुरानो बसपार्कलगायत ३२ ठाउँमा चोरी गरेको प्रारम्भिक अनुसन्धानबाट खुलेको छ, थप अनुसन्धान भइरहेको छ', चिमोरियाले भने । उनका अनुसार श्रेष्ठ कोटेश्वरमा डेरा गरी बस्दै आएका थिए ।
महाशाखाका निमित्त प्रमुख एसपी प्रकाशजंग कार्कीले भने, 'चाडबाडको समयमा चोरीका घटना अन्य समयभन्दा अलि बढी हुँदै आएका छन् । यस्ता घटनालाई ध्यानमा राखी काठमाडौं प्रहरी र महाशाखाको टिम बनाएर सूचना संकलन गरी सप्रमाण चोर पक्राउ गर्ने अप्रेसन चलाएका छौं ।'
महाशाखाले डीएसपीको नेतृत्वमा चोरी पिलर नै खडा गरेर लामो समयदेखि चोरी, लुटपाट र डकैतीका घटनाको अनुसन्धान एवं कारबाही गर्दै आएको छ ।
प्रतिक्रिया दिनुहोस !
