काठमाडौं: अखिल नेपाल फुटबल संघ (एन्फा) को अध्यक्ष र उपाध्यक्ष पदका लागि सोमबार निर्वाचन हुने भएको छ । निर्वाचनको सम्पूर्ण तयारी पूरा भएको निर्वाचन समितिले जनाएको छ । नेपाली खेलकुदमा निकै चासोका साथ हेरिएको एन्फा निर्वाचनका लागि विश्व फुटबल महासंघ (फिफा) र एसियाली फुटबल महासंघ (एएफसी) का प्रतिनिधि शनिबार नै नेपाल आइसकेका छन् ।
एन्फाको तीन वर्षअघि सम्पन्न चुनावी साधारणसभापछि हालसम्म नियमित साधारणसभासमेत हुन सकेको छैन । एन्फाको यो नियमित साधारणसभा पनि हो । साधारणसभाले अध्यक्षको प्रतिवेदन र आर्थिक प्रतिवेदनसमेत पारित गर्ने एन्फाका प्रवक्ता एवं प्रमुख कार्यकारी अधिकृत इन्द्रमान तुलाधरले बताए । अध्यक्षको प्रतिवेदन कार्यवाहक अध्यक्ष नरेन्द्र श्रेष्ठ र आर्थिक प्रतिवेदन कोषाध्यक्ष विराटजंग शाहीले प्रस्तुत गर्नेछन् ।
अध्यक्षको र आर्थिक प्रतिवेदनपछि अध्यक्ष र उपाध्यक्ष पदका लागि निर्वाचन हुनेछ । एन्फाको विधान संशोधनलगायतका विषयमा भने नयाँ कार्यसमिति बनेपछि अर्को साधारणसभाले निर्णय गर्ने बताइएको छ । यसअघि एन्फाको विधान फरक-फरक रहेको विषयमा विवाद हुँदै आएको थियो ।
अध्यक्ष पदका लागि एन्फाका कार्यवाहक अध्यक्ष नरेन्द्र श्रेष्ठ र उपाध्यक्ष कर्माछिरिङ शेर्पाबीच प्रतिस्पर्धा हुनेछ । एक उपाध्यक्षमा एन्फाका सहायक महासचिव मणि कुँवर, नेपाली राष्ट्रिय फुटबल टोलीका पूर्वकप्तान एवं प्रशिक्षक उपेन्द्रमान सिंह र दीपक खातीबीच भिडन्त हुनेछ । मणिले नरेन्द्रको प्यानलबाट चुनाव लड्न लागेका हुन् । पूर्वसदस्य दीपक कर्माको पक्षबाट चुनावी मैदानमा छन् । उपेन्द्रमान स्वतन्त्र रुपमा मैदानमा उत्रिएका छन् ।
एन्फा निर्वाचनमा ४५ जिल्ला, १२ वटा 'ए' डिभिजन, पाँच वटा 'बी' डिभिजन र तीनवटा 'सी' डिभिजन तथा रेफ्री, प्रशिक्षक, खेलाडी र महिला समितिबाट एकएक गरी ६९ प्रतिनिधिले चुनावमा मत दिन पाउने व्यवस्था छ । तर झापा जिल्लाले यसअघि नै मतदान नगर्ने निर्णय गरेको छ । 'बी' डिभिजनबाट मताधिकार पाएको श्रीकुमारी क्लबले दुईवर्षे प्रतिबन्धको कारबाहीमा परेका कारण मत दिन पाउने छैन । एन्फा निर्वाचनका अब ६७ जना प्रतिनिधिले मत खसाल्नेछन् ।
अध्यक्ष पदका दुवै प्रत्यासीले आआफ्नै जित सुनिश्चित रहेको दाबी गर्दै आएका छन् । ६७ मतमध्ये १३/१४ जना प्रतिनिधिले खुलेर समर्थन नगरेकाले परिणाम जस्को पक्षमा पनि जान सक्ने अनुमान गरिएको छ । नरेन्द्रले यसअघि २२ जिल्ला, १० क्लब र तीन समितिको समर्थन आफूलाई रहेको दाबी गर्दै आएका छन् । कर्माछिरिङले भने आफूलाई ३७ जिल्ला र विभिन्न क्लबको समर्थन रहेको दाबी गरेका छन् ।
एन्फा अध्यक्ष र उपाध्यक्ष पदको लागि यो निर्वाचन आगामी एक वर्षको लागि हुन लागेको हो । एन्फाको यस कार्यसमितिको कार्यावधि २०७४ कात्तिकसम्म रहनेछ । फिफाले भ्रष्टाचारको आरोपमा २०७२ कात्तिक ३० गतेदेखि लागू हुने गरी निवर्तमान अध्यक्ष गणेश थापालाई १० वर्षको प्रतिबन्ध र करिब २१ लाख रुपैयाँ जरिबानाको कारबाही गरेपछि अध्यक्ष पद रिक्त रहँदै आएको थियो । यसैगरी तत्कालीन वरिष्ठ उपाध्यक्ष ललितकृष्ण श्रेष्ठको २०७२ साल जेठ २९ गते निधन भएपछि सो पद पनि रिक्त बनेको थियो ।
प्रतिक्रिया दिनुहोस !
