घट्दैछ सेयर बजार

काठमाडौं: पुँजी बजारमा मंगलबार दोहोरो अंकको गिरावट आएको छ । दसैं अघिदेखिनै घट्न थालेको सेयर बजारमा बैंकिङ, होटेल र बिमा समूहको परिसूचक उच्च दरमा घटेपछि समग्र नेप्से ओरालो लागेको हो । धितोपत्र बजारमा सूचीकृत अधिकांश कम्पनीले लाभांश घोषणा गरिसकेको अवस्थामा बजार नकारात्मक देखिएको छ ।

मंगलबार नेप्से परिसूचक १ दशमलव शून्य १ प्रतिशतले घटेको छ । सबै समूह रातो भएपछि नेप्से परिसूचक १७.८९ अंकले घटेर एक हजार सात सय ५१ विन्दुमा आइपुगेको छ । कुल बजार पुँजीकरण १९ खर्ब ४३ अर्ब रुपैयाँ पुगेको छ । मंगलबार बजार खुलेदेखिनै बजार निरन्तर आर्लिएको थियो । बजार घट्दै जाँदा कारोबार रकमसमेत खुम्चिएको छ ।

नेप्से परिसूचकसँगै कारोबार रकममा पनि गिरावट आएकाले बजारले लगानीकर्तालाई निराश बनाएको छ । अन्य दिन औसत एक अर्ब रुपैयाँ बराबरको कारोबार हुने धितोपत्र बजार मंगलबार २१ करोड रुपैयाँले घटेर ७१ करोड ३२ लाख रुपैयाँमा बजार खुम्चिएको छ । एक सय २७ कम्पनीको कारोबारमा यस दिन सात लाख ६४ हजार कित्ता सेयर किनेबेच भयो ।

मंगलबारको कारोबारमा सबैभन्दा धेरै होटेल समूहको परिसूचक १.५२ प्रतिशतले घटेको छ । बिमा समूहको परिसूचक १.४४ र बैंकिङ समूहको सूचक १.१७ प्रतिशतले ओरालो लागेको छ । विकास बैंकको सूचक शून्य दशमलव ९५ प्रतिशतले घटेको छ भने जलविद्युत् कम्पनीको सेयरमा सामान्य गिरावट आएको छ । फाइनान्सको परिसूचक शून्य दशमलव २९ प्रतिशतले गिरावट आएको छ ।

बजारमा उच्च गिरावट आए पनि सिभिल बैंक र सिनर्जी फाइनान्स लिमिटेडको सेयर मूल्य भने करिब १० प्रतिशतले बढेको छ । सिभिल बैंकको सेयर मूल्य ९ दशमलव ८० प्रतिशतले बढेर अन्तिम मूल्य दुई सय ८० पुगेको छ । यस बैंकको मंगलबारदेखि कारोबार सुरु भएको हो । इन्टरनेसनल लिजिङ एन्ड फाइनान्स कम्पनीसँग मर्ज भएपछि बन्द भएको काराबोर यस दिनदेखि खुलेको हो । सिनर्जी फाइनान्सको ९ दशमलव ७० प्रतिशतले बढेको हो ।

हालै मात्र पुँजी वृद्धि योजना सार्वजनिक गरेको स्ट्यान्डर्ड चार्टर्ड बैंकको सर्वाधिक सेयर किनबेच भएको छ भने सबैभन्दा बढी रकमको सेयर कारोबार पनि चार्टर्डकै भएको छ । यो बैंकको मंगलबार ६ करोड ५४ लाख रुपैयाँको सेयर कारोबार भई तीन हजार चार सय ६८ रुपैयाँ प्रतिसेयर कारोबार भयो ।

बैंक तथा वित्तीय संस्थामा तरलता अभाव भएका खबर सार्वजनिक हुन थालेपछि बजार ओरालो लाग्नेक्रम सुरु भएको हो ।

पछिल्लो समय स्टान्डर्ड चार्टर्डलगायतका कम्पनीको पुँजी वृद्धिको योजना सार्वजनिक गरेको र समग्र सेयर बजार ओर्लिएका कारण घटेको भाउमा लगानीकर्ता स्ट्यान्डर्ड चार्टर्डकै सेयरमा सबैभन्दा बढी आकर्षित भएको देखिन्छ । एभरेस्ट बैंकको ५० करोड ८९ लाख रुपैयाँको सेयर कारोबार भएको छ ।

सबैभन्दा धेरै एनएमबी बैंकको सेयर मूल्य ६ प्रतिशतभन्दा बढीले घटेको छ । एनएमबी बैंकको सेयर मूल्य भने ६ दशमलव ५३ प्रतिशतले घटेको छ । नेप्सेमा कारोबार भएका कम्पनी मध्ये २७ कम्पनीको सेयरमूल्य बढेको छ, ९० कम्पनीको मूल्य घटेको छ । १० कम्पनीको सेयर मूल्य स्थिर छ ।

बैंक तथा वित्तीय संस्थामा तरलता अभाव भएका खबर सार्वजनिक हुन थालेपछि बजार ओरालो लाग्नेक्रम सुरु भएको हो । बैंकले मुद्दती निक्षेपमा लगानीकर्तालाई आठ प्रतिशतसम्मको ब्याज घोषणा गर्न थाल्दा लगानीकर्ताको मनोबल केही खस्किएको अनुमान विश्लेषकले गर्न थालेका छन् । त्यसबाहेक चाडपर्वको सिजन भएकाले धेरै जसो लगानीकर्ता फेस्टिभ मुडमा रहेकाले पनि कम लगानी भएको हुन सक्ने अनुमान ब्रोकरले गरेका छन् ।

लगानीकर्ता बजार थोरै घट्दा वा बढ्दा आत्तिन नपर्ने धितोपत्र बोर्डका प्रवक्ता निजर गिरीले बताएका छन् । उनले भने, 'सेयर बजार कस्तो रहन्छ भनी तिहारअघि बताउन गाह्रो हुन्छ ।'