कामकारबाही जारी राख्न अख्तियारका आयुक्तलाई प्रधानमन्त्रीको निर्देशन
काठमाडौँः प्रधानमन्त्री पुष्पकमल दाहालसँग अख्तियार दुरुपयोग अनुसन्धान आयोगका निमित्त आयुक्त दीप बस्न्यातसहितका आयुक्तले भेटवार्ता गरेका छन् ।
प्रधानमन्त्री कार्यालय सिंहदरबारमा बुधबार भएको भेटवार्तामा प्रमुख आयुक्त लोकमानसिंह कार्कीविरुद्ध संसद्मा महाभियोग प्रस्ताव दर्ता भएपछिको अवस्थाका विषयमा केन्द्रित रहेको थियो ।
प्रधानमन्त्रीका प्रेस सल्लाहकार गोविन्द आचार्यले नियमित भेटघाटअन्तर्गत बुधबारको भेट भएको बताए ।
भेटमा प्रधानमन्त्रीले स्वायत्त र स्वतन्त्र निकायको रुपमा आफ्नो काम जारी राख्न आयोगलाई आग्रह गरेको आचार्यले जानकारी दिए ।
प्रधानमन्त्रीले आयोगको कामकारबाहीमा राजनीतिक दल र सरकारको पूर्ण सहयोग रहने प्रतिबद्धता व्यक्त गरेका छन् ।
गत कात्तिक ३ गते प्रमुख आयुक्त कार्कीविरुद्ध संसद्मा एमाले र माओवादी केन्द्रका एक ५७ सांसदले महाभियोगको प्रस्ताव दर्ता गरेपछि कार्की निलम्बित भएका छन् ।
कार्की निलम्बनमा परेपछि वरिष्ठताको आधारमा बस्न्यातले निमित्त प्रमुख आयुक्तको जिम्मेवारी पाएका छन् । रासस
प्रतिक्रिया दिनुहोस !
