दमौली: संघीय मामिला तथा स्थानीय विकासमन्त्री हितराज पाण्डेले बस चढेर बसपार्क उद्घाटन गरेका छन् । व्यास नगरपालिकाले ७ वर्षयता निर्माण गरिरहेको दमौली बसपार्क सञ्चालनमा आएको अवसरमा उनी बसै चढेरै कार्यक्रमस्थल पुगेका हुन् ।
उक्त अवसरमा मन्त्री पाण्डेले सशस्त्र युद्धको समयमा निकै जोखिमयुक्त यात्रा गरेको प्रसंग स्मरण गरे, 'मलाई त्यो दिनको सम्झना आयो ।' बसपार्कका लागि पृथ्वी राजमार्गसम्म जोड्ने र बुल्दीखोलामा पक्की पुलको आवश्यकता रहेको उनको भनाइ छ । त्यसका लागि आवश्यक पहल गर्ने उनले आश्वासनसमेत दिए ।
तनहुँमा अब १२ वटासम्म स्थानीय निकाय रहने र पहिलेजस्तो धेरै छलफल जरुरी नभएकाले चाँडै नै कतिवटा बनाउने भन्ने विषयले टुंगो पाउने उनको विश्वास छ ।जनताले भाषणभन्दा प्रतिफल चाहेको र त्यसमा आफू काम गर्न प्रतिबद्ध रहेको उनको भनाइ छ ।
सफा, उज्यालो र हरियो व्यास नगरपालिका आफ्नो सपना भएको व्यास नगरपालिकाका कार्यकारी अधिकृत डिल्लीराम सिग्देलले बताए । त्यसका लागि नगरपालिकाले काम थालेको उनले जानकारी दिए । दमौलीमा ल्यान्डफिल साइटको समस्या समाधानका लागि तिहारपछि नै वातावरणीय अध्ययन सुरु हुने उनले बताए । दमौलीलाई सफा राख्न बाधक बनेको देउराली नगरस्थित अव्यवस्थित वधशालाको विकल्पका लागि सार्वजनिक जग्गाको खोजी भएको उनको भनाइ छ । बजार सफाइमा नगरपालिका तथा सरकारी कार्यालयका कर्मचारीको सक्रियता एवं नियमित सरसफाइ कार्यक्रम जारी रहेको उनले बताए ।
नगरपालिकामा यसै वर्ष सोलार बत्ती पनि राखिने सिग्देलको भनाइ छ । नगरपालिकाको २ करोड ७ लाख रुपैयाँमा निर्मित बसपार्कमा सिमेन्टको भाग, तारबार आदिको काम भने बाँकी नै छ । यसै वर्ष थप ५० लाख रुपैयाँ बजेटबराबरको काम हुने बसपार्कको सञ्चालनका लागि पक्की सडक तथा बुल्दी खोलामा व्यवस्थित पुल आवश्यक रहेको उनले बताए ।
दुर्घटनाको अति जोखिम हुँदाहुँदै पनि बसपार्क सञ्चालनमा ल्याउन आफूले पहल गरेको छोटो समयमै काम सफल भएको प्रमुख जिल्ला अधिकारी दीपक सुवेदीको भनाइ छ । माओवादी केन्द्रका केन्द्रीय सचिवालय सदस्य हरिबहादुर चुमानले नगरपालिका बनेको २४ वर्षपछि मात्र बसपार्क बनेको भन्दै अझै धेरै काम हुनुपर्नेमा जोड दिए ।
प्रतिक्रिया दिनुहोस !
