काठमाडौं: सार्थक जनसंगीत प्रतिष्ठानका लागि हङकङ हिमायतीले निर्माण गरेको वृत्तचित्र 'डढेलोभित्रका सतिसाल'को आइतबार हङकङमा प्रिमियर गरिएको छ । वृत्तचित्रमा पाँच दशक अघिदेखि गीतसंगीतको माध्यमबाट सामाजिक, राजनीतिक चेतना छर्न सक्रिय रामेश र उनीजस्तै स्रष्टाहरूको सांगीतिक जीवन चित्रण गरिएको छ ।
वृत्तचित्र प्रदर्शन समारोहमा हङकङवासीका तर्फबाट रामेशलाई सम्मान गरिएको थियो । 'जनता देशका मालिक भएकाले देश बनाउन जनता नै अघि सर्नुपर्छ । भ्रष्ट नेताविरुद्ध खबरदारी गरिरहनुपर्छ', रामेशले भने । संसारभर छरिएर रहेका नेपालीले आफ्नो कमाइ पठाएर देशलाई जोगाइरहेको बताउँदै उनले हङकङवासीको प्रयासले जनताका लागि आफूले गरेको प्रयास वृत्तचित्रमा लिपिबद्ध हुने भएकोमा खुसी व्यक्त गरे ।
रामेशलाई केन्द्रबिन्दुमा राखेर बनाइएको वृत्तचित्रमा संगीतमा लागेका रायन, मञ्जुल, राल्फा समूहका सदस्यसहित स्वतन्त्र र पार्टीमा आबद्ध कलाकार, गीतकार, संगीतकार, लेखक, विश्लेषक, नेताहरूको अनुभवसमेत समेटिएको छ । प्रणय लिम्बू र डम्बरकृष्ण श्रेष्ठ (अनुशील)ले निर्देशन गरेको वृत्तचित्रमा चेतनाको बिगुल फुक्ने राल्फा, संकल्प, आस्था परिवार, रामेशलगायतको जीवनसंघर्ष समेटिएको छ । वृत्तचित्र बाबुराम नेपालीले खिचेका हुन् ।
प्रतिक्रिया दिनुहोस !
