सैनिक श्रीमती संघले बनाएको विद्यालय समुदायलाई हस्तान्तरण

लमजुङः सैनिक श्रीमती संघले आफ्नै स्रोत र साधनमा निर्माण गरेको विद्यालय समुदायलाई हस्ताण्तरण गरीएको छ। पूर्वी लमजुङको भारते–२, बेलघारीको रत्न प्राविको नवनिर्मित भवन समुदायलाई हस्तान्तरण गरेको हो ।

बैशाख १२ गते गएको  विनाशकारी भूकम्पले विद्यालयको भवन र पर्खाल भत्काएपछि नेपाली सेनाको पशुपति प्रसाद गणको पहलमा सैनिक श्रीमती संघले विद्यालय भवन निर्माण गरेको हो ।

नवनिर्मित ६ कोठे भूकम्प प्रतिरोधी विद्यालय भवनको बिहीबार प्रधानसेनापति राजेन्द्र क्षेत्री र सैनिक श्रीमती संघकी अध्यक्ष रीता क्षेत्रीले संयुक्त रुपमा उद्घाटन गरे। नेपाली सेनाको हेलीकोप्टरबाट सैनिक अधिकृतसहित आएका क्षेत्री दम्पतीले विद्यालयको अवलोकन गरे ।

गाउँमा आएका सैनिक सेनापतिलाई स्वागत गर्न भारते, अर्चलबोट र भोटेवडारका स्थानीयको बाक्लो उपस्थिति थियो । सेनापतिलाई जग्गादाता जंगबहादुर थापा र चन्दादाता चमेली श्रेष्ठले माला, दोसल्लाले ओढाएर स्वागत गरेका थिए ।
    
विद्यालयको उद्घाटन पश्चात आयोजित कार्यक्रमलाई सम्बोधन गर्दै सैनिक श्रीमती संघकी अध्यक्ष रीता क्षेत्रीले सानो सहयोगले बालबालिकाको भविष्य उज्वल बनाउन मद्धत मिल्ने बताइन् ।

भारते, अर्चलबोट र भोटेवडारका बिद्यार्थीले अध्ययन गर्दै आएको सो विद्यालय पुननिर्माण पश्चात स्थानीय खुशी छन् । ‘पठनपाठनमा निकै समस्या थियो, विद्यालयकी प्रधानाध्यापक सरस्वती खनालले अन्नपूर्णसँग भनिन, ‘सैनिक श्रीमती संघको सहयोगले केही राहत मिलेको छ ।’

एक सय बढी विद्यार्थी पढ्ने प्राथमिक विद्यालयमा अहिले ४० विद्यार्थीमात्रै अध्ययनरत छन् । पहिरोका कारण बेलघारी बजारका थुप्रै स्थानीयले बस्ती सरेपछि विद्यार्थीको संख्या घटेको विद्यालयका संस्थापक राजकुमार पाण्डे बताए ।