नेपालबाहिर जुनसुकै मुलुक गए पनि आफ्नो चाडपर्वको महत्त्व बेग्लै हुन्छ । विभिन्न सेलिब्रेटीले विदेश बसाइका क्रममा आफ्नो चाडपर्वलाई धेरै 'मिस' गर्ने गरेका छन् । नजिकिँदै आएको तिहारका अवसरमा लामो समय विदेश बसेर नेपाल फर्केका केही सेलिब्रेटीसँग विदेश हुँदाको तिहार र यस वर्ष तिहार मनाउने तयारीका बारेमा रामकला खड्काले कुराकानी गरेकी छन्:
यसपालि सेल पकाउँछु
जल शाह
अमेरिकामा बसे पनि म तिहार मौलिक तरिकाले मनाउने गर्छु । सेल, अनरसा लगायतका मिठाई असाध्यै मन पर्छ । तर, बनाउनचाहिँ आउँदैन । यसपालि बनाउने प्रयास गर्ने विचार राखेको छु । मलाई जहाँसम्म लाग्छ, सेल त बन्दैन । तर, म सक्दो प्रयास गर्नेछु । छोरी पनि लक्ष्मीकै रूप भएकाले मेरी आठ वर्षीया छोरी कलशलाई सिँगारपटार गरेर टीका लगाई दक्षिणा दिने गर्छु । साथै लक्ष्मीमाताको पूजाअर्चना गरेर घरभरि बत्ती बाल्छु । पोहोर त मैले दिलीप रायमाझी दाइलाई टीका लगाइदिएको थिएँ । यसपालिको लागि पक्का भइसकेको छैन । नेपालमा जति रमाइलो नभए पनि रमाइलोसँग मनाउने सोच छ ।
शोक परेकाले रौनक छैन
रमेश उप्रेती
हामी नेपाली जहाँ गए पनि सनातन धर्म मान्ने वर्ग भएकाले दसैंतिहार आएपछि छुट्टै प्रकारको रमाइलो हुन्छ । नेपालभन्दा बाहिर बस्दा त झन् आफ्नो चाडपर्वको विशेष महत्त्व लाग्छ । तिहारमा यताको जस्तो घर सजाउने, झिलिमिली पार्नेलगायतका सानासाना कुरामा ध्यान पुर्याएर पर्व मनाउने भन्ने त हुँदैन । सायद त्यहाँ हामी अर्को समुदायमा बस्ने भएकाले पनि होला ।
तर पनि आफ्नो चाडपर्व मनाउने बहानामा हामी साथीभाइ मिलेर भेटघाट र खानपिन गथ्र्यौं । काम र परिस्थिति मिलाएर बढीभन्दा बढी मनोरञ्जन गर्ने कोसिस गथ्र्यौं । सम्बन्धको विकृति बजारमा देखेको, सुनेको र घटेको पनि भएकाले मैले अमेरिकामा भने कसैलाई पनि दिदीबहिनी बनाएर टीका लगाइनँ । मेरो निधार सधैं खाली नै रहन्थ्यो । धेरैपछि नेपाल आएर मात्रै टीका लगाए । यसपटक पनि मंगलबार मेरो हजुरबुवाको निधन भएकाले तिहारमा त्यति धेरै रौनक हुँदैन । टीका पनि हुन्छ कि हुँदैन थाहा छैन ।
दाजुसँग घुमफिर
आशिष्मा नकर्मी
म स्टुडेन्ट भिसामा अमेरिका गएको थिएँ । टेक्ससमा बस्थे । यो एकदमै धेरै नेपाली बस्ने ठाउँ भएकाले पनि हामीले हरेक चाडपर्व उत्तिकै रमाइलोका साथ मनाउँथ्यौं । तिहारमा लक्ष्मीपूजा पनि गर्थें । घरमा ममीले गरेको सम्झँदै पूजा गर्थें । पूजाअगाडि घर लिप्नुपर्छ भनेर केही नपाउँदा पानीले नै लिप्थेँ । नेपाल सोसाइटी अफ डल्लासले आयोजना गर्ने म्हँ पूजामा सहभागी हुन्थेँ । बरु यहाँका नेपालीले विस्तारै अरूका संस्कृतिमा रमाउन थालेका छन् ।
उता बस्दा त नेपाली संस्कृति नै प्यारो लाग्ने हुनाले यताभन्दा पनि राम्रोसँग तिहार मनाइन्थ्यो । मेरो दाजुभाइ नभएकाले विदेशमात्रै होइन, नेपालमा पनि आजसम्म भाइटीका लगाएको छैन । तर, मैले बनाएको दाइसँग त्यो दिन भेट्छु । उहाँ मलाई धेरै माया गर्नुहुन्छ र म पनि उहाँलाई माया गर्छु । यो आत्मीयता हामीबीचमा भएकाले टीका नै लगाउनुपर्छजस्तो मलाई लाग्दैन । यस दिन आफ्नो आफ्नो दाजुसँग घुमफिर गर्छु ।
पढाइमै व्यस्त भएँ
आस्तिक शेरचन, फेसन डिजाइनर
मैले सन् २००८ देखि पाँच वर्षसम्म फ्रान्समा फेसन डिजाइनिङ कोर्स गरेको हुँ । त्यति बेला म पढाइमा नै धेरै व्यस्त हुने भएकाले तिहार मनाउन नै पाइनँ । हामीले बाल्यकालमा पनि तिहार धूमधामसँग मनाएर दिदीको हातको टीका लगाउने गरिन्थ्यो । पछि दिदी पनि अमेरिका जानुभएपछि टीका लगाउने अवसर पनि जुरेको छैन । मलाई तिहार कुनै नयाँ ठाउँ घुमेर नै मनाउन मन लाग्छ । यसपालि पनि नेपालको कुनै नयाँ ठाउँ घुमेर नै तिहार मनाउने विचार गरेको छु । तर, कुन ठाउँ हो भन्ने टुंगो लागेको छैन ।
दिदीबहिनीको याद आउँछ
जीवनकुमार थापा, व्यवसायी
व्यवसायका क्रममा दक्षिण कोरिया गएको एक दशक भयो । यसबीचमा पहिलोपटक यसपालि तिहार मनाउन नेपाल आएको छु । दसैंतिहार नेपालीका लागि महत्त्वपूर्ण र रमाइलो चाड हो । सानोमा तिहारमा रमाइलो गरेका क्षणहरू सारै अविस्मरणीय लाग्छ । हुन त कोरियामा पनि अहिले नेपालीको संख्या निकै भइसकेको छ । दसैंतिहार मनाउँछन् ।
म रेस्टुरेन्ट र फूलको व्यवसायमा लागेकाले यस्तो अवसरमा नेपाली दाजुभाइ, दिदीबहिनीलाई प्रायः फेन्तेकस्थित आफ्नै रेस्टुरेन्टमा बोलाउँछु । कार्यक्रम हुन्छ । फेन्तेकमा नेपालीहरू निकै छौं । कहिलेकाहीँ विभिन्न संघसंस्थाले कार्यक्रम आयोजना गर्छ । कोरियामा पनि नेपालीबीच देउसीभैलो खेल्ने, रमाउने चलन सुरु भइसकेको छ । तर नेपालमा जस्तो फुर्सद र रमाइलो हुँदैन । विदेशमा हुँदा खासगरी भाइटीका, दिदीबहिनी, गाउँको देउसीभैलोको याद बढी आउँछ ।
आफन्तको यादले सताउँछ
मीरा लम्साल, ब्युटिसियन
तिहार मलाई साह्रै मन पर्ने चाड हो । गत सालको तिहार मैले आफ्नो देश र आफ्नो ठाउँमा मनाउन पाइनँ । पोर्चुगलमा तिहार मनाएको पोहोर मैले पहिलोपटक थियो । त्यति बेला साह्रै सम्झना आएको थियो आफ्नो ठाउँको । साह्रै नरमाइलो लाग्यो । तिहार भन्नेबित्तिकै मैले आफ्नो दाजुभाइलाई धेरै मिस गरेँ ।
त्यो झिलिमिली, त्यो देउसीभैलो अनि त्यो मखमली र सयपत्री फूल, ती सबैको रौनक त्यहाँ कहाँ पाउनु र ? तैपनि आफ्नो संस्कार र संस्कृति जोगाउन नेपालीले खोलेको पसलमा गएर सामान ल्याइयो, घरमै सेलरोटी बनाइयो, रंगोली पनि बनाइयो अनि लक्ष्मीपूजा गरियो । साथीभाइसँग बसेर रमाइलो गर्ने र तास खेल्ने पनि गरियो । विदेशमा रहँदा चाडपर्वमा आफ्नो ठाउँ र आफन्तको धेरै याद आउँदो रहेछ । जे भए पनि यसपालि साथीहरूलाई बोलाएर तिहार मनाउने योजना छ ।
मज्जा नै नआउने
अञ्जु भट्टराई/प्रिन्सिपल, अक्षरा स्कुल, पेप्सीकोला
सन् २०१३ मा कामविशेषले कोरिया गएको थिएँ । दसैंतिहारको समयमा त्यहाँ पुगेकाले हामीले सिउलमै चाड मनाएका थियौं । त्यहाँ तिहार मनाउने क्रममा साथीभाइ जम्मा भएर रेस्टुराँमा बस्ने, खानपान र गफ गर्नमै रमायौैं । नेपालमा हुँदा जताततै ढकमक्क फुलेको फूल, सबैको बेहुलीझैं चिटिक्क सिँगारिएका घरहरू देख्दा चाडपर्वको वातावरण नै बेग्लै हुन्छ । तर, विदेशमा हुँदा नेपाली समुदाय मिलेर चाड मनाउने र भाइटीका लगाउने गरिए पनि यहाँको जस्तो माहोल नहुँदा मज्जा नै नआउँदो रहेछ ।
प्रतिक्रिया दिनुहोस !
