लोकमानको बिषयमा परराष्ट्रमन्त्री महतले भनेः निर्णय संसदीय दलले गर्छ
![लोकमानको बिषयमा परराष्ट्रमन्त्री महतले भनेः निर्णय संसदीय दलले गर्छ](https://annapurnapost.prixacdn.net/media/albums/Prakash-Saran-Mahata-581477f015e755.95167727_QFehPDdArt.jpg)
चितवनः परराष्ट्रमन्त्री डा प्रकाशशरण महतले नेपाली कांग्रेसको संसदीय दलले अख्तियार दुरुपयोग अनुसन्धान आयोगका प्रमुख लोकमानसिंह कार्कीमाथिको महाअभियोग विषयको टुङ्गो लगाउने बताएका छन् ।
नेपाल प्रेस युनियन चितवनले शनिबार गरेको पत्रकार सम्मेलनमा नेपाली कांग्रेसका नेता समेत रहेका डा महतले पार्टीको केन्द्रीय समितिले यो विषयको टुङ्गो लगाउने जिम्मा संसदीय समितिलाई दिएको बताए ।
न्यायिक प्रक्रिया अघि बढिरहेको भन्दै उनले यसको टुङ्गो लाग्दै गर्दा कांग्रेसले पनि निर्णय लिने उल्लेख गरे । नेपाली कांग्रेस परिपक्क पार्टी भएको भन्दै उनले न्याय र सुशासनको पक्षमा पार्टी कहिल्यै नचुक्ने बताए ।
फरक प्रशङ्गमा मन्त्री महतले भारतीय राष्ट्रपतिको नेपाल भ्रमणका क्रममा कुनै सन्धि सम्झौता नहुने बताए। कार्यकारी तहबाट सहमति सम्झौता हुने भन्दै उनले भारतीय राष्ट्रपति संवैधानिक राष्ट्रप्रमुख भएकाले यो भ्रमण सद्भाव भ्रमण भएको स्पष्ट पारे ।
हालै मात्र भारतमा भएको दुई देशको बैठकमा नेपालका पक्षबाट महत्वपूर्ण प्रस्ताव पेस भएको भन्दै उनले भारत जान साथै केकेन दिन्छन् भन्ने भ्रमलाई चिर्दै यस पटकको बैठकमा नेपालको स्वार्थ र आवश्यकतालाई ध्यानमा राखेर कुरा अगाडि बढाएको बताए । रासस
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)