भारतीय राष्ट्रपति भ्रमण बुधबारदेखि

काठमाडौः भारतीय राष्ट्रपति प्रणव मुखर्जी तीनदिने राजकीय भ्रमणमा बुधबार नेपाल आउँदैछन् । उनलाई स्वागत गर्न विद्यादेवी भण्डारी आफैं त्रिभुवन विमानस्थल जाने भएकी छन् ।

उच्चस्तरीय भारतीय प्रतिनिधिमण्डलका साथ मुखर्जी बुधबार मध्याह्न १२ः३० बजे त्रिभुवन विमानस्थलमा अवतरण गर्ने कार्यक्रम छ । राष्ट्रपति भण्डारीको मैत्रीपूर्ण निमन्त्रणामा उनी नेपाल आउन लागेका हुन् । उनलाई विमानस्थलको अतिविशिष्ट कक्षमा उच्च सम्मानका साथ ‘सेरेमोनियल रिसेप्सन' दिइने भएको छ । भ्रमण टोलीमा रक्षा राज्यमन्त्री, विदेश सचिव, पत्रकार, सांसद, सुरक्षाकर्मीलगायत ८० जना रहने बताइएको छ ।

भारतीय राष्ट्रपति विमानस्थलबाट सीधै शीतलनिवास पुगेर राष्ट्रपति भण्डारीसँग एक बजे द्विपक्षीय वार्ता गर्नेछन् । त्यसपछि लैनचौरस्थित भारतीय दूतावासमा आयोजित जलपान समारोहमा सहभागी हुनेछन् । भारतीय राष्ट्रपतिको सम्मानमा सोही दिन राष्ट्रपति भण्डारीले स्टेट ‘ब्यांक्वेट' दिनेछिन् ।

उक्त समारोहमा शीर्ष राजनीतिक दलका नेता, मन्त्री, कूटनीतिज्ञलगायत विशिष्ट व्यक्तित्वलाई निमन्त्रणा गरिएको छ । मुखर्जीलाई राजधानीको होटल हायातमा बस्ने व्यवस्था मिलाइएको छ । राष्ट्रपति मुखर्जी बिहीबार बिहान १० बजे पशुपति पुगेर पूजाअर्चनामा सहभागी हुनेछन् ।

होटल फर्केपछि उपराष्ट्रपति नन्दबहादुर पुन, प्रधानमन्त्री पुष्पकमल दाहाल, प्रमुख प्रतिपक्षी दलका नेता केपी शर्मा ओलीलगायत विभिन्न दलका नेताले मुखर्जीलाई भेट्ने कार्यक्रम छ । मधेसी दलका नेताले संयुक्त रूपमा मुखर्जीलाई भेट्नेछन् ।

मुखर्जी काठमाडौं महानगरपालिकाद्वारा सभागृहमा आयोजित नागरिक अभिनन्दनमा सहभागी हुने कार्यक्रम छ । इन्डिया फाउन्डेसनले होटल र्‍याडिसनमा आयोजना गर्ने नेपाल-भारत सम्बन्ध विषयक कार्यक्रममा राष्ट्रपति मुखर्जी सहभागी हुने भएका छन् ।

सोही दिन अपराह्न त्रिभुवन आर्मी क्लबमा आयोजित कार्यक्रममा काठमाडौं विश्वविद्यालयले मुखर्जीलाई मानार्थ विद्यावारिधि प्रदान गर्नेछ । त्यसपछि होटल द्वारिकामा प्रधानमन्त्री दाहालले मुखर्जीलाई रात्रिभोज दिने कार्यक्रम छ । रात्रिभोजमा थोरै विशिष्ट पदाधिकारी सहभागी हुने छन् । भ्रमणको अन्तिम दिन शुक्रबार भारतीय राष्ट्रपति बिहान १० बजे विमानबाट जनकपुर पुग्नेछन् । जानकी मन्दिरमा पूजाअर्चनापछि जनकपुर उपमहानगरपालिकाले आयोजना गर्ने नागरिक अभिनन्दनमा सहभागी हुने कार्यक्रम छ ।

मुखर्जी जनकपुरपछि विमानबाट पोखरा प्रस्थान गर्ने कार्यक्रम छ । पोखरास्थित होटल ग्रान्डमा राष्ट्रपतिको टोलीले दिवाभोज गर्ने कार्यक्रम छ । भारतीय भूपू गोर्खा सैनिकलाई मुखर्जीले सम्बोधन गर्नेछन् । पोखराबाट विमानमा भारतीय राष्ट्रपति त्रिभुवन विमानस्थल आउनेछन् ।

 

उनी शुक्रबार अपराह्न ४ः३० मा स्वदेश फर्किने कार्यक्रम तय भएको छ । राष्ट्रपति भण्डारीले नै मुखर्जीलाई बिदाइ गर्नेछिन् । गत वर्ष नेपालले जारी गरेको संविधानमा भारतले स्वागत नगरी पाँच महिना नाकाबन्दी गरेको थियो । उसले हालसम्म नेपालको संविधानको स्वागत गरेको छैन । नाकाबन्दीपछि नेपालमा बिग्रिएको सम्बन्ध सुधारका लागि समेत भारतीय पक्षले राष्ट्रपति मुखर्जीको भ्रमण अवसरलाई उपयोग गर्ने देखिएको छ ।

भारतीय राष्ट्रपतिको १८ वर्षपछि नेपाल भ्रमण हुन लागेको हो । सन् १९९८ मा तत्कालीन भारतीय राष्ट्रपति केआर नारायणननपछि भारतीय राष्ट्रपतिको नेपाल भ्रमण भएको छैन । नेपालबाट भने यो अवधिमा पूर्वराजा ज्ञानेन्द्र तथा गणतन्त्र घोषणापछि पूर्वराष्ट्रपति रामवरण यादवले पटक-पटक भारत भ्रमण गरेका थिए ।

आगामी ९ महिनापछि राष्ट्रपतिको कार्यकाल सकिन लागेका मुखर्जी विगतमा कांग्रेस आईका वरिष्ठ नेता थिए । विगतमा विदेशमन्त्री, रक्षामन्त्री र वित्तमन्त्रीको हैसियतमा उनले नेपाल भ्रमण गरेका थिए ।
मुखर्जीले तत्कालीन सात दल र विद्रोही माओवादीबीच २०६३ को दोस्रो जनआन्दोलनअघि १२ बुँदे समझदारी गराउन भूमिका खेलेको बताइन्छ ।

हालैको पत्रकार सम्मेलनमा भारतीय विदेश मन्त्रालयका नेपाल डेस्क प्रमुख सुधार दलेलाले मुखर्जीलाई नेपालका सबै राजनीतिक दलसित ‘राम्रो सम्बन्ध' भएको नेताका रूपमा अथ्र्याएका छन् । भारतीय विदेश मन्त्रालयले मुखर्जीको भ्रमणलाई ‘विशेष सद्भावना भ्रमण' भनेको छ । ‘नेपालसँगको सदियौँदेखिको सम्बन्धलाई अझै सुदृढ गर्ने भ्रमणको उद्देश्य हो', दलेलाले भनेका छन् ।