उपचार नपाउँदा तीन वर्षदेखि साङलोमा
विराटनगरः मानसिक सन्तुलन गुमेपछि मोरङको मधुमल्ला १ का ४९ वर्षीय तिलकबहादुर कार्कीलाई तीन वर्षदेखि फलामको साङ्लोमा बाँधेर राखिएको छ ।
घरछेउमा त्रिपाल टाँगेर बनाइएको टहरामा साङ्लोमा बाँधिएर बस्नुपर्दा उनको दैनिकी कष्टकर बनेको छ । उपचार अभावमा उनी छटपटाइरहेका छन् । आर्थिक अवस्था कमजोर हुँदा उनको उपचार हुन नसकेको हो ।
मानसिक सन्तुलन गुमेका कारण जे पायो त्यही गर्न थालेपछि सुरक्षाका लागि पनि साङ्लोमा बाँधेर राख्नुपरेको ७८ वर्षीय बुबा दलबहादुर बताउँछन् । ‘बुढेसकालको सहारा छोरालाई नै साङ्लोमा बाँधेर राख्नुपरेपछि समस्या थपिएको छ', उनले भने, ‘उपचार गर्ने पैसा नै छैन ।'
केही सहयोग पुग्ने आशा गरिएका छोराकै यस्तो दुर्गति देखेर उनी पीडामा छन् । ‘बुढेसकालमा मेरो स्याहार गर्ला भनेको त साङ्लोमा बाँधेर उसकै पो हेरचाह गर्नुर्यो', उनले भने, ‘कसरी रोग निको पार्ने भन्ने चिन्ता बढेको छ ।' हुन त तिलबहादुरको सामान्य उपचार गरिएको हो ।
तर, पैसा अभावका कारण प्रभावकारी उपचार पाउने स्वास्थ्य संस्थासम्म पुर्याउन नसकिएको दलबहादुरको भनाइ छ ।
तिलकबहादुर बिरामी परेपछि सम्पत्तिका नाममा एउटा घर र एक धुर मात्र जग्गा रहेको कार्की परिवारको बिल्लीबाठ भएको छ । ‘साङ्लोमा बाँधिएको छोरो रोएको, कराएको र चिच्याएको हेरेर बस्न बाध्य छु', दलबहादुरले भने, ‘उपचारमा कसैले सहयोग गरिदिने हो भने छोरो ठीक हुने आशा भने जीवितै छ ।'
छोराको उपचार कसरी र कहाँ लगेर गर्ने भन्ने कुराको हेक्का आफूसँग नभएको उनको गुनासो छ ।
‘मेरी श्रीमती पनि हालै खसिन् । काजकिरिया केही दिनअघि मात्र सकिएको हो । श्रीमती हुँदा छोराको रेखदेख र हेरचाह गर्न सजिलो थियो । अहिले समस्या भयो । के गर्ने, कसो गर्ने भइरहेको छ', उनले भने । आफ्नो पनि मृत्यु भएपछि छोराको हेरचाह गर्ने परिवारमा कोही नहुने उनले बताए ।
दलबहादुर आफै पनि बिरामी छन् । बुढ्यौलीले छोप्दै जाँदा पहिलेजस्तो बल छैन । उनी भन्छन्, ‘सकीनसकी छोराको स्याहार गर्दै छु । आफ्नो छोरोको उपचार भए छोराले आफै गरिखाने थियो ।'
स्थानीय दिपीन खड्काका अनुसार तिलक पहिले राम्रा थिए । पढेका पनि थिए । ‘एक्कासि के रोग लाग्यो पत्तो लगाउनै सकिएन', उनले भने । बिरामी हुनुअघि साह्रै असल तिलकबहादुर बिरामी परेर साङ्लोमा बाँधिनुपर्दा आफन्त र छिमेकीको मनसमेत अमिलिएको खड्काको भनाइ छ । ‘मानसिक सन्तुलन गुमे पनि सहयोग गर्ने कोही निस्किएनन्', उनले भने, ‘छिमेकीको पीडा हेरेर बस्नुको विकल्प भएन ।' तिलकबहादुरको उपचारका लागि न्यानो अभियानले पाँच हजार रुपैयाँ सहयोग गरेको छ ।
मानसिक सन्तुलन गुमेपछि तीन वर्षदेखि साङ्लोमा बाँधिएका मोरङको मधुमल्ला १ का ४९ वर्षीय तिलकबहादुर कार्की ।अन्नपूर्ण
प्रतिक्रिया दिनुहोस !
