सिन्डिकेटले यात्रु हैरान

भापाः भद्रपुरकी सविता बस्नेत आइतबार साँझ बिर्तामोडस्थित भद्रपुर रोडमा घर जाने गाडी कुरिरहेकी थिइन् । उनले करिब एक घन्टा गाडी कुरिन् तर सार्वजनिक बस आएन । बस नआएपछि उनले सडक छेउमा पार्किङ गरेको निजी मारुती भ्यानका चालकलाई भद्रपुर जाने भनेर सोधिन् । उनले जाने त भने तर एक जनाको भाडा दुई सय रुपैयाँ मागे । सवितासँग चर्काे भाडा तिरेर घर जानुको विकल्प थिएन । उनी त्यही भ्यानमा घर गइन् ।

बेलुकाको ५ बजेपछि सधैजसो बिर्तामोड–भद्रपुर सडकको दक्षिणतर्फ यात्रुको लाम लाग्छ । उनीहरू सार्वजनिक बसको पर्खाइमा बसेका हुन्छन् । तर, उनीहरूको पर्खाइ बेकार हुन्छ । त्यही सडकछेउमा पार्किंङ गरेर बसेका ट्याक्सी वा मारुती भ्यानले सबारीसाधनको पर्खाइमा बसेका यात्रुलाई चन्द्रगढी वा भद्रपुरसम्मको भाडाका लागि मोलमोलाई सुरु गर्न थाल्छन् । साँझ झमक्क भएपछि ती यात्रुलाई महँगो भाडा तिरेर गन्तब्यमा जान बाध्य बनाउँछ ।

यो श्रृंखला एक दिनको मात्र होइन वर्षाैंदेखि चलिरहेको छ । दिउँसोको समयमा मनग्गे सार्वजनिक बस चले पनि बेलुका भएपछि यात्रुको विचल्ली हुने गरेको छ । झापा सुगम जिल्ला भनेर चिनिए पनि जिल्लाको सदरमुकाम जान बेलुकाको समयमा सार्वजनिक बस नपाउँदा सर्वसाधारण आजित छन् ।

दिउँसो मानिसको चाप बढी हुने भएका कारण मनग्गे सवारीसाधन पाइन्छ । तर, जब मान्छेको भीड अलि कम हुन्छ तब बस मालिक झापा दक्षिणका लागि बस पठाउन आनाकानी गर्छन् । मेची बस व्यवसायीका सचिव राजेन्द्र रिजालका अनुसार मेची यातायात संघ र पूर्वाञ्चल यातायात संघमा आबद्ध यात्रु बस बिर्तामोड–भद्रपुर सडकमा चल्ने गर्छन् ।

झापा सुगम जिल्ला भनेर चिनिए पनि त्यही सुगम जिल्लाको सदरमुकाम जान बेलुकाको समयमा सार्वजनिक बस नपाउँदा सर्वसाधारण आजित छन् ।

तर, ती संघका पदाधिकारीलाई बिर्तामोड -भद्रपुर रुटमा बेलुका बस चलाउन अनुरोध गरे पनि उनीहरूले त्यसमा आनाकानी गर्ने गरेको उनले बताए । रिजालले भने, ‘हामीले पटकपटक अनुरोध गर्‍यौं तर उहाँहरूले टेर्नुभएको छैन । अब गम्भीर छलफल गर्नुपर्ने भएको छ । यातायात व्यवसायीले नाफा मात्र होइन सेवा पनि दिन सक्नुपर्छ ।'

पूर्वाञ्चल यातायात संघका अध्यक्ष पारस उप्रतीले बेलुकाको समयमा बिर्तामोड-भद्रपुर रुटमा मान्छे नहुने भएकाले बस चलाउन नसकिएको दाबी गरे । उनले मादक पदार्थ सेवन गरेका मान्छे पनि सवारीमा चढ्ने भएकाले यो रुट बेलुकाका लागि असुरक्षित रहेको दाबी गरे । उप्रतीले भने, ‘हामीले बस साहुलाई बाध्य बनाउन सक्दैनौं बेलुका त्यो रुटमा बस चलाउन । मान्छे नभएपछि कहाँबाट आम्दानी हुन्छ र चलाउनु ? '

बिर्तामोडबाट दैनिक साँझ भद्रपुर जाने एक जना व्यवसायी प्रवेश सरियाले दिनहुँ कोही न कोही व्यक्ति आफ्नो गाडीमा लाने गरेको बताए । उनका अनुसार बेलुका ५ बजेपछि भद्रपुर बस स्ट्यान्डमा यात्रु बस कुरेर बसेका हुन्छन् तर बस आउँदैन । उनी भन्छन्, ‘यो त अति भएको हो । चन्द्रगढी–भद्रपुर जान मानिसले बेलुका भएपछि निकै ठूलो खर्च गर्नुपर्छ ।' यात्रुका अनुसार साना सवारीमा भद्रपुर जाँदा एक जनाको एक सय ५० रुपैयाँसम्म तिर्नुपर्छ ।

जिल्ला ट्राफिक प्रहरी कार्यालय झापाका प्रमुख प्रहरी निरीक्षक ढुण्डिराज गिरीका अनुसार पूर्वाञ्चल यातायात संघको एकाधिकारका कारण अन्य सवारीसाधन बिर्तामोड–भद्रपुर रुटमा चलाउन नसकिएको हो । गिरीले भने, ‘न उसले आफ्ना बस चलाउँछ न साना ट्याक्सी वा अन्य सार्वजनिक सवारी हाल्न दिन्छ ।'