भुकम्पले भत्किएका लघुजलबिद्युत आयोजना धमाधम मर्मत हुँदै

बेसीशहरः गत बैशाख १२ गते गएको बिनाशकारी भुकम्पका कारण क्षतबिक्षत बनेका लमजुङका लघुजलद्यिुत आयोजनाको धमाधम मर्मत हुन थालेको छ । भुकम्पका कारण अत्यधिक क्षति बनेको पूर्वी लमजुङको कोल्की, ईलमपोखरी र पाचोकमा निर्माण भएर अत्यधिक क्षति पुगेका लघुजलबिद्युत आयोजनाको पूननिर्माण भईरहेको हो ।

कोल्कीको क्रिखोला लघुजलबिद्युत आयोजना र चिल्ली खोला लघुजलबिद्युत आयोजनाको पुननिर्माण भईरहेको छ । राष्ट्रिय प्रशारण लाईन नपुगेको कोल्कीमा लघुजलबिद्युत आयोजनाबाटै स्थानीयले बिद्युतको उपयोग गर्दै आएका थिए । कोल्की-५, क्रिखोला र कोल्की-४ को चिल्लीखोला लघुजलबिद्युत आयोजनाबाट कोल्कीका १ सय ४८ घरपरिवार लाभान्वित हुँदै आएका थिए । तर, बैशाख १२ को भुकम्पका कारण क्षति पुगेपछि स्थानीय अहिलेसम्म अन्धकारमा बस्न बाध्य भईरहेका छन् ।

क्रि र चिल्ली खोला लघु जलबिद्युत आयोजनामा युएसएडको आर्थिक सहयोगमा साझेदारी बिकास परियोजनाबाट १० लाख र स्थानीयको ५० हजार रकममा भत्किएको लघुजलबिद्युत आयोजनाको पुननिर्माण भईरहेको हो ।

त्यसै गरी ईलमपोखरीका पाँच वटा लघुजलबिद्युत आयोजनामा पनि मर्मतको काम भइरहेको छ । यहाँका पाँच आयोजना मध्ये केहीमा मर्मत सकाएर बिजुली बाल्न थालीएको छ भने केही आयोजनामा मर्मतको भईरहेको छ । ईलमपोखरी-६, मा रहेको छहरे खोला लघुजलबिद्युत आयोजनामा फलामे पोल गाडिएको छ ।

भत्किएको पावरहाउस पुननिर्माण पश्चात गाउँका ८५ घरधुरीले भुकम्प गएको १५ महिना पछि बिजुली बत्ती बाल्न थालेका छन् । गाउँमा बत्ती बल्न थालेपछि स्थानीय उत्साहित छन् । 'काठको पोल कोही भाँच्चिए, कोही कुहीए, स्थानीय ओम गुरुङ भन्छन, ' नयाँ फलामे पोल गाड्न थालीएपछि गाउँमा बत्ती बल्न थालेको छ ।'

ईलमपोखरी-४ सानोकाभ्रेमा रहेको दोस्रो पैंसे खोला लघुजलबिद्युत आयोजनामा पावर हाउस मर्मतको काम भईरहेको आयोजनाका अध्यक्ष गोपीराम गुरुङले जानकारी दिए । सो आयोजनाबाट १ सय १५ घरधुरी लाभान्वित हुँदै आएका छन् ।

यसैगरी ईलमपोखरी-३, ठुलोकाभ्रेमा रहेको पहिलो पैंसे खोला लघुजलबिद्युत आयोजानमा मर्मत भईरहेकाको छ । पानीको मुहानमा धाँजा फाट्नुका साथै पहिरो गएर भत्किएपछि बिद्युत अबरुद्ध भएपनि मर्मतसँगै सूचारु भएको छ । ईलमपोखरी-२, फुलङ्गीरीमा रहेको लाँखरखोला लघुजलबिद्युत आयोजनामा भत्किएको पावरहाउसको मर्मत भईरहेको छ । यो आयोजनाबाट गाउँका ९४ जना घरधुरी लाभान्वित हुँदै आएका छन् ।

ईलमपोखरी-१, माडीमा रहेको कोछनेखोला लघुजलबिद्युत आयोजनामा मर्मत भईरहेको छ । भत्किएको क्यानल (पानी ल्याउने कुलो) मर्मत पछि यहाँपनि बत्ती बल्न थालेको हो । ईलमपोखरीको पाँच लघुजलबिद्युत आयोजनामा युसएडको आर्थिक सहयोगमा साझेदारी बिकास परीयोजना बाट बिनीयोजन भएको १० लाख र ईलमपोखरीका स्थानीयहरुले उठाएको ८५ हजार रकममा भुकम्पले भत्किएको लघुजलबिद्युत आयोजनाको काम भईरहेको हो ।

यसैगरी पाचोकमा रहेको किसेदी खोला लघुजलबिद्युत आयोजनको पनि पुननिर्माण धमाधम शुरु भईरहेको साझेदारी बिकास कार्यक्रमको स्थानीय साझेदार संस्था जनचेतना अभिबृद्धि र बिकास अध्ययन समिति कोपाडेसका कार्यक्रम संयोजक बिजय गुरुङले जानकारी दिए । उनका अनुसार यो आयोजना मर्मतका लागि झण्डै ८ लाखको रकम बिनीयोजन भएको छ । पाचोक-७ मा रहेको यो आयोजनाबाट गाउँका १ सय ६७ घरधुरी लाभान्वित हुादैआएका छन् ।