काठमाडौं: प्रधानमन्त्री पुष्पकमल दाहाल प्रचण्डले मुलुकको समृद्धिका लागि सरकार संविधान संशोधनको गम्भीर गृहकार्यमा जुटेको बताएका छन् । नेपाल संवत ११३७ को अवसरमा शुभकामना सन्देश दिँदै प्रधानमन्त्री प्रचण्डले संविधानको स्वीकार्यताले संविधान कार्यान्वयनका साथै मुलुकको समृद्धिमा ठूलो योगदान पुर्याउने बताएका छन् ।
प्रधानमन्त्रीले नेपाल संवत्का प्रवर्तक एवम् राष्ट्रिय विभूति शङ्खधर साख्वाःले खेलेको भूमिका अविस्मरणीय रहेको भन्दै यो हाम्रो मौलिख संवत्का रुपमा रहेको बताएका छन् ।
प्रधानमन्त्रीले जारी गरेको शुभकामना सन्देशमा भनिएको छ-'नेपाल संवत् नेपालको मौलिक संवत् हो । जनतालाई ऋणबाट मुक्त पार्ने अभियानका अभियान्ता शङ्खधर साख्वाःले समकालीन समाजमा परिवर्तनको महत्वपूर्ण जग बसाल्नुभएको थियो ।'
नेवारी समुदायमा जन्मिएर सिङ्गो देशकै गरिमा र मौलिकताका निम्ति साख्वाःले पुर्याउनुभएको योगदान सबैका लागि प्रेरणादायी भएको प्रधामन्त्रीले उल्लेख गरेका छन् ।
प्रधानमन्त्रीले सन्देशमा भनेका छन्-'आजको २१औँ शताब्दीको विकसित युगमा सबै जाति, भाषा, संस्कृति र समुदायको विविधता र पहिचानलाई स्थापित गरेर मात्र देशको आन्तरिक राष्ट्रियता सुदृढ गर्न र देशको स्वाधीनताको रक्षा गर्न सकिन्छ ।'
गणतन्त्र स्थापनापछि आफ्नै प्रधानमन्त्रीत्वकालमा नेपाल संवत्लाई राष्ट्रिय संवत्का रुपमा घोषणा गर्ने अवसर मिलेको स्मरण गर्दै अहिले नेपाल संवतलाई राष्ट्रिय संवत्का रुपमा स्थापित गर्ने र व्यवहारमा कार्यान्वयन गर्ने जिम्मेवारी हामी सबैको काँधमा रहेको सन्देशमा उल्लेख छ ।
प्रतिक्रिया दिनुहोस !
