पटाका पडकाउँदा आगलागी
राजविराजः तिहारका बेला पटाका पडकाउँदा सप्तरीको विषहरियामा मंगलबार आगलागी भएको छ ।
केटाकेटीले पडकाएको पटाकाले आगलागी हुँदा विषहरिया गाविस ७ का हरीनारायण यादवको घरमा आगलागी भएको सप्तरी प्रहरीले जानकारी दिएको छ । आगोले यादवको घरमा रहेको कपडा, किताब, कापीहरु जलेर नष्ट भएको प्रहरी नायव उपरिक्षक दानबहादुर कार्कीले बताए ।
यसैगरी गाइगोठमा बालेको घुरबाट पोर्ताहा ४ मा आगलागी हुँदा पाँच लाख मूल्य बराबरको क्षति भएको छ । असर्फी लोटिया यादवको गाइगोठबाट सल्केको घुरबाट उनको गाइगोठ र पूजा घर तथा छिमेकी लक्ष्मण यादवको गाइगोठ र टिनको छानो भएको घर जलेर नष्ट भएको सप्तरी प्रहरीले जनाएको छ ।
यसैबीच प्रहरीले सप्तरीको बोदे बसाईन ३ मा भण्डारण गरी राखेको ५० हजार मूल्य बराबरको प्रज्वलनशिल पदार्थ पटाका प्रहरीले बरामद गरेको छ ।
खगेन्द्र साहको घर पसलमा भण्डारण गरेको अवस्थामा पटाकाहरु फेला परेपछि बरामद गरिएको सप्तरी प्रहरीले जनाएको छ । बरामद पटाकाहरु मंगलबार जिल्ला प्रहरी कार्यालयको प्राङ्गणमा पानी भरिएको खाल्डोमा पुरेर नष्ट गरिएको छ ।
प्रतिक्रिया दिनुहोस !
