प्रहरी चौकीमा गाउँलेकै आक्रमण

सुर्खेतः सुर्खेतको आग्रीगाउँ गाविसस्थित प्रहरी चौकीमा स्थानीयले आक्रमण गरेका छन् । मंगलवार राति स्थानीय देउली प्रहरी चौकीमा आक्रमण भएको हो । चौकी कव्जा गरेर गाउँलेले प्रहरीका सवै हतियारसमेत लुटेका हुन् । चौकीमा आक्रमण भएपछि सदरमुकाम वीरेन्द्रनगरबाट राति १२ बजे प्रहरी प्रमुख एसपी मोहन आचार्यको नेतृत्वमा घटनास्थलमा थप प्रहरी टोली पुगेको छ ।

आग्रीगाउँसँग सिमाना जोडिएको छिमेकी गाविस काफलकोटका युवा र प्रहरीबीच मंगलवार दिउँसो विवाद भएको थियो । उक्त विवाद समाधानका लागि स्थानीय बासिन्दा र प्रहरीबीच विवादमा मुछिएका प्रहरी जवान नरबहादुर विकलाई सरुवा गर्ने सहमति भएको थियो । तर, उक्त सहमति प्रहरीले नमानेको भन्दै करिव ३० जनाको संख्यामा स्थानीय बासिन्दा घरेलु हतियारहरु बञ्चरो र आँसी बोकेर प्रहरी चौकीमा आक्रमण गर्न पुगेका थिए । सोही क्रममा उनीहरुले प्रहरी चौकीमा तोडफोड गर्नुका साथै प्रहरीका सवै हतियारसमेत खोसेर लिएका छन् ।

मध्यपश्चिमाञ्चल क्षेत्रीय प्रहरी कार्यालय सुर्खेतकाअनुसार मदिरा सेवन गरेका स्थानीय युवा र प्रहरीबीच विवाद भएको थियो । उक्त विवादपछि स्थानीयले घरेलु हतियारसहित राती चौकीमै आक्रमण गरेका हुन् । क्षेत्रीय प्रहरी प्रमुख डीआईजी माधवप्रसाद नेपालले चौकीमा आक्रमण भएको र हतियारसमेत खोसिएको पुष्टी गरे । यद्यपी उनले खोसिएका सबै हतियार प्रहरीले बुधवार नियन्त्रणमा लिइसकेको र सात जनालाई पक्राउ गरिएको बताए ।

प्रहरीकाअनुसार गाउँलेले चौकीबाट तीनवटा राइफल, एउटा पेस्तोल र एक सय ५० राउण्डभन्दा बढी गोली लुटेका थिए । प्रहरीले सवै हतियार फेला पारिएको दावी गरे पनि एउटा पेस्तोल र ५० राउण्ड गोली भने हालसम्म फेला नपरेको श्रोतले जनाएको छ । यस्तै केही थान हत्कडीसमेत फेला परेका छैनन् ।

घटनापछि अवस्था तनावपूर्ण बनेको छ । अहिले घटनास्थलमा व्यापक रुपमा प्रहरी परिचालन गरिएको स्थानीय लोकबहादुर शाहीले जानकारी दिए । उनकाअनुसार प्रहरीले फेला नपरेका हतियार तत्काल बुझाउन स्थानीय बासिन्दासँग हारगुहार गरिरहेका छन् । घटनामा संलग्न अधिकांश स्थानीय बासिन्दा फरार रहेका कारण पनि हतियार फेला नपरेको बताइएको छ ।

लुटिएका केही हतियार स्थानीय खोला र गाउँलेको घरमा फेला पारिएको प्रहरीले जनाएको छ । घटनामा संलग्न रहेको भन्दै प्रहरीले काफलकोट–९ का केशरसिंह ठकुरी, तिलक सिंह, प्रेम खत्री, चित्रबहादुर केसी र चन्द्रबहादुर सिंहलगायत सात जनालाई नियन्त्रणमा लिइएको डीआईजी नेपालले जनाए । प्रहरीले घटनालाई सामान्य बनाउन पहल भइरहेको जनाएको छ । गाउँलेले चौकी नै कव्जामा लिएपछि प्रहरीले घटनालाई समान्य बनाउन सहमतिका लागि पहल गरिरहेको छ ।