भारतीय राष्ट्रपतिको सवारीमा सर्वसाधारणलाई हिँड्न रोक छैनः प्रहरी
काठमाडौँः भारतीय राष्ट्रपति प्रणव मुखर्जीको सवारीको क्रममा सर्वसाधारणलाई सडकपेटीबाट हिँड्न रोक नलगाइएको नेपाल प्रहरीले जनाएको छ ।
प्रहरी प्रवक्ता प्रहरी नायव महानिरीक्षक हेमन्त मल्लले सवारीको क्रममा सर्वसाधारणलाई हिँडडुल गर्न कुनै प्रतिबन्ध नलगाइएको प्रष्ट पारे ।
उनले भने, ‘सवारीको क्रममा बीच सडकमा भने हिँड्न दिने कुरा भएन, सडक किनारा र पेटीबाट हिँड्न रोक लगाइएको छैन ।’
प्रवक्ता मल्लले सवारी चल्ने ‘रुट’ का पसल, सटर बन्द गराइने भन्ने विषय पनि हल्ला मात्रै भएको स्पष्ट पारे ।
प्रहरीले यसरी सर्वसाधारणलार्य हिड्न रोक नलगाएको उल्लेख गरे पनि सर्वसाधारण भने सडकमा घन्टौँ हिड्नबाट बच्चित भएका छन् । कतिपय स्थानमा एम्बुलेन्स समेत रोकिएको भन्दै सामाजिक सञ्जालमा त्यसको चार्को विरोध गरिएको छ ।
सामाजिक सञ्जालमा भारतीय राष्ट्रपतिको स्वागतका नाममा सरकारलाई जनतालाई दुःख दिएको भन्दै चर्को विरोध गरिएको छ । अधिकांशले सरकारले आवश्यकता भन्दा बढी सुरक्षाको हवाला गरेर सर्वसाधारणलाई सास्ती दिएको भन्दै अलोचना गरेका छन् ।
सामाजिक सञ्जालमा चर्को आलोचना भएपछि प्रहरीले सवारीमा सर्वसाधारणलाई हिडडुल गर्न रोक नलगाएको दाबी गरेको हो ।