साझेदारी तीनै देशको हितमाः प्रधानमन्त्री

काठमाडौंः प्रधानमन्त्री पुष्पकमल दाहालले चीन, नेपाल र भारतबीच त्रिदेशीय साझेदारीबाट तीनवटै देशले लाभ लिनसक्ने बताएका छन् ।

भारतका राष्ट्रपति प्रणव मुखर्जीको नेपाल भ्रमणका अवसरमा इन्डिया फाउन्डेसन, नीति अनुसन्धान प्रतिष्ठान र नेपाल सेन्टर फर कन्टेम्पोररी स्टडिजले काठमाडौंमा आयोजना गरेको नेपाल—भारत सम्बन्धमा नयाँ आयामको खोजी विषयक दुईदिने गोष्ठी बुधबार उद्घाटन गर्दै प्रधानमन्त्री दाहालले साझेदारी तीनै देशको हितमा रहेको बताए ।

‘नेपाल भारत र चीनजस्ता उदीयमान शक्तिका बीचमा रहनु अवसर हो', उनले भने, ‘आर्थिक समृद्धितर्फ दू्रतगतिमा बढिरहेका भारत र चीनबाट नेपालले लाभ लिन सक्छ ।'

नेपालमा नयाँ संविधान जारी भएपछि भारतले गत वर्ष लगाएको पाँचमहिने नाकाबन्दी र त्यसले दुई देशबीचको सम्बन्धमा ल्याएको तिक्ततातर्फ लक्षित गर्दै प्रधानमन्त्रीले नेपाल र भारतबीच यदाकदा असमझदारी र बेमेल हुने गरे पनि त्यसले दुई देशबीचको सम्बन्धको आधार हल्लाउन नहुने बताए । उनले भने, ‘विगतमा केही असमझदारी र बेमेलका शृंखला देखिएका थिए तर ती असमझदारी र बेमेलका शृंखलाका कारण जनस्तरको सम्बन्ध हल्लिनु र सद्भाव बिग्रनु हुँदैन ।'

भारतसँग नेपालको देश—देशबीचको मात्र नभई जनस्तरको सम्बन्ध रहेको भन्दै उनले सम्बन्धलाई अझ सुदृढ र सशक्त बनाउन गम्भीरतासाथ लागेको बताए । भारतबाट नेपालले उच्च प्रविधि, दक्ष जनशक्तिको प्रसारको आशा गरेको उनले प्रस्ट पारे ।

नेपालको समृद्धि र विकासमा भारतीय सहयोगको अपेक्षा गरे । भारतले नेपालको शान्ति र विकासमा विगतमा गर्दै आएको सहयोगका लागि धन्यवाद व्यक्त गर्दै भविष्यमा सहयोग अझ प्रभावकारी हुने दाहालको विश्वास थियो । भारतसँग बढ्दो व्यापार घाटा कम गर्न भारतीय पक्षबाट पहलकदमी हुने उनले विश्वास लिए ।

दुई देशले गठन गरेको प्रबुद्ध समूहले द्विपक्षीय हितका लागि वृहत छलफल गरी निष्कर्ष निकाल्ने दाहालको विश्वास थियो । उनले सरकारस्तरमा मात्र नभई जनस्तरसम्म सम्बन्ध र द्विपक्षीय हितको विषय प्राथमिकतामा पर्नुपर्नेमा जोड दिए ।

भारतीय जनता पार्टीका महासचिव तथा इन्डिया फाउन्डेसनका निर्देशक राम माधवले नेपालमा सबैलाई चित्त बुझ्नेगरी संविधान कार्यान्वयन होस् भन्ने भारतको चाहना रहेको बताए । भारत नेपालको समृद्धि, शान्ति र दिगो विकासको पक्षमा रहेको उल्लेख गर्दै सहमतिबाट त्यस्तो लक्ष्य हासिल हुने उनले दाबी गरे ।

नेपाल र भारत मिलेर अगाडि बढ्नुपर्नेमा जोड दिँदै उनले भने, ‘हामी मिलेर अगाडि बढौं । दुवै देशको हितको रक्षार्थ मिलेर जाऔं ।' उनले नेपाल र भारतबीचको सम्बन्ध हिमालभन्दा अग्लो र भारतीय सागरभन्दा गहिरो रहेको बताए । गोष्ठीको समापन बिहीबार अपराह्न भारतीय राष्ट्रपति प्रणव मुखर्जीले गर्ने कार्यक्रम छ ।