पाकिस्तानले आफ्ना ६ कर्मचारी फिर्ता बोलायो

नयाँ दिल्लीः पाकिस्तानले बुधबार भारतको राजधानी नयाँदिल्लीस्थित उच्चायोगमा कार्यरत आफ्ना ६ जना अधिकारीलाई इस्लामाबाद फिर्ता बोलाएको छ ।

गत साता नयाँदिल्लीमा कार्यरत पाकिस्तानी कूटनीतिज्ञ महमुद अख्तरलाई भारतीय प्रहरीले अवाञ्छित गतिविधिमा लागेको भन्दै अयोग्य भनी घोषणा गरेलगत्तै पाकिस्तानले यस्तो कदम चालेको हो । दिल्ली प्रहरीले अख्तरलाई भारतको जासुसी गरेको र सुरक्षा दस्तावेज चोरी गरेको आरोपमा नियत्रणमा लिई सोधपुछ पनि गरेको थियो ।

पाकिस्तानी उच्चायोगका ती ६ जना अधिकारी वाघा बोर्डर हुँदै पाकिस्तान पुगेको लाहोरबाट जनाइएको छ । अख्तरले जासुसी गर्ने काममा ती ६ जना अधिकारी पनि संलग्न रहेको जानकारी दिएका थिए ।

पाकिस्तानी उच्चायोगका कूटनीतिज्ञ अख्तर भने भारतले आफ्ना देशका लागि अयोग्य घोषणा गरेपछि गत साता नै फिर्ता भएका थिए । उनलाई भारतले ४८ घण्टाभित्र भारत छाड्न आदेश दिएको थियो ।
यसअघि पाकिस्तानी गुप्तचर संस्था आइएसआईका कर्मचारी रहेका उनी भिसा शाखामा कार्यरत थिए ।

अख्तरलाई देश निकाला गरेलगत्तै पाकिस्तानले पनि इस्लामाबादस्थित भारतीय उच्चायोगमा कार्यरत भारतीय कूटनीतिज्ञ सुरजित सिंहलाई पाकिस्तान छाड्न लगाएको थियो ।

दुई कूटनीतिज्ञ निष्काशन गर्दै पाकिस्तान

पाकिस्तानले इस्लामाबादस्थित भारतीय उच्चायोगमा कार्यरत दुईजना कूटनीतिज्ञलाई भारतीय गुप्तचर संस्था रिसर्च एन्ड एनालाइसिस विङ ‘रअ’ का जासुस भएको आरोपमा देश निकाला गर्ने भएको छ । पाकिस्तान टुडेले कूटनीतिक आवरणमा उनीहरूले पाकिस्तानमा आतंकवादी गतिविधिलाई सहयोग गरेको उल्लेख गरेको छ ।

राजेशकुमार अग्निहोत्री एवं बलीर सिंहलाई यस्तो आरोप लगाइएको उक्त समाचार पत्रले जानकारी दिएको छ । अग्निहोत्री वाणिज्य काउन्सुलर र सिंह प्रेस जानकारी सचिवका रूपमा कार्यरत छन् । उनीहरूले पाकिस्तानमा आतंकवादलाई बढाउन सहयोग गरेको र आर्थिक सहायतथा गरेको दाबी गरिएको छ ।