राज्यपोषित आतंकवादविरुद्ध लाग्यौः भारतीय राष्ट्रपति
![राज्यपोषित आतंकवादविरुद्ध लाग्यौः भारतीय राष्ट्रपति](https://annapurnapost.prixacdn.net/media/albums/CIvic-Feliciation-to-Inidan-President-Mukharjee-00-581be84e101c37.17853700_i8kpAnGwtv.jpg)
काठमाडौः भारतीय राष्ट्रपति प्रणव मुखर्जीले आतंकवादका कारण एसिया क्षेत्रको शान्ति र स्थिरतामा असर परिरहेको धारणा राख्दै राज्यपोषित सीमापार आतंकवादविरुद्ध सबै देश लाग्नुपर्ने बताएका छन् ।
इन्डिया फाउन्डेसन र नीति अनुसन्धान प्रतिष्ठानले बिहीबार काठमाडौंमा आयोजना गरेको ‘नेपाल र भारतः नयाँ आयामको खोजी' विषयक गोष्ठी समापन गर्दै भारतीय राष्ट्रपति मुखर्जीले त्यस्तो बताएका हुन् ।
‘आतंकवादविरुद्ध उभिनु आज हाम्रो आवश्यकता बनेको छ । शान्ति र स्थिरताका लागि आतंकवादका सबै स्वरूपविरुद्ध हामी उभिनुपर्छ', उनले भने ।
मुखर्जीले बिमस्टेक, सार्कजस्ता क्षेत्रीय मञ्चमार्फत नेपाल र भारतले शान्ति, विकास र स्थिरताका लागि काम गरिरहेको बताए । उनले नेपाल यतिबेला नयाँ युगको संघारमा उभिएको स्मरण गर्दै बहुदलीय लोकतन्त्रबाट प्राप्त उपलब्धिको रक्षा गर्दै सामाजिक र आर्थिक रूपान्तरणको मार्गमा अघि बढिरहेको बताए ।
भारतले नेपालका जनताले अघि बढाएका कामको सदैव प्रशंसा गर्दै आएको उल्लेख गर्दै उनले भारतले लोकतन्त्र संस्थागत गर्ने प्रक्रियामा संस्थाहरूको विकासमा नेपालले चाहेको सहयोग दिन उत्सुक रहेको बताए ।
भारतीय राष्ट्रपतिले संविधान कार्यान्वयनका लागि लोकतान्त्रिक ढाँचाभित्र रहेर सबै पक्षलाई समेटी अघि बढ्न आग्रह गरे । संविधानबारे भारत सरकारको अहिलेसम्मकै अडानअनुरूप उनले संविधानको स्वागत भने गरेनन् ।
शान्ति स्थिरताका लागि आतंकवादका सबै स्वरुपविरुद्व हामी उभिनुपर्छ । प्रणव मुखर्जी । भारतीय राष्ट्रपति
यस्तै अभिव्यक्ति राष्ट्रपति मुखर्जीले बिहीबार काठमाडौं महानगरपालिकाको नागरिक अभिनन्दन समारोह तथा काठमाडौं विश्वविद्यालयले प्रदान गरेको महाविद्यावारिधिको उपाधि ग्रहण गर्दा पनि व्यक्त गरेका थिए ।
काठमाडौं महानगरपालिकाको नागरिक अभिनन्दन कार्यक्रममा मुखर्जीले नेपालको दिगो विकासका लागि भारत सबै पक्षमा सहयोग गर्न तत्पर रहेको बताएका थिए ।
इन्डिया फाउन्डेसन र नीति अनुसन्धान प्रतिष्ठानको कार्यक्रममा भने उनले नेपालको संविधान कार्यान्वयन प्रक्रिया सफल होस् भन्ने भारतको शुभेच्छा रहेको बताएका थिए ।
‘दुई निकट छिमेकीका रूपमा नेपाल र भारतले काम गरिरहेका छन् । नेपाल र भारतबीचको सम्बन्ध सही दिशामा अघि बढिरहे पनि अझै धेरै कुरा गर्न बाँकी छ । नेपाल र भारतबीचका सम्बन्धका सम्भावनालाई साकार पार्न दुवै देश मिलेर काम गर्नुपर्नेछ', मुखर्जीले भने ।
नेपाल र भारतबीच ‘सिभिलाइजेसनल लिंकेज' र भ्रातृत्वपूर्ण सम्बन्ध रहेको उल्लेख गर्दै उनले खुला सिमाना र एक–अर्काे देशका नागरिकलाई राष्ट्रिय व्यवहार गरिएका कारण जनताको साझा विश्वास र साझा गन्तव्य रहेको बताए ।
नेपाल र भारतबीच परस्पर हितका क्षेत्रमा एक अर्काको हिस्सा रहेको मुखर्जीले बताए । नेपाल र भारतका साथै यस क्षेत्रका जनताको शान्ति, स्थिरता र कल्याणका लागि दुवै देशले मिलेर काम गर्नुपर्ने उनले बताए ।
भारतले छिमेकी मुलुकलाई पहिलो प्राथमिकता दिने नीतिअनुसार नेपालसँगको सम्बन्धलाई उच्च महत्व दिइरहेको मुखर्जीले बताए । शान्तिपूर्ण सहअस्तित्व र साझा समृद्धिको मार्गचित्रअनुसार नेपाल र भारतबीचको द्विपक्षीय सम्बन्ध अघि बढिरहेको उनले बताए ।
दुई देशबीचको सम्बन्ध ऐतिहासिक, सांस्कृतिक र मौलिक रहेको उनको भनाइ थियो ।
नेपाली विद्यार्थीलाई विशेष सुविधा
भारत सरकारले भारतमा सूचनाप्रविधि विषयमा ग्र्याजुएसन गर्न चाहने नेपाली विद्यार्थीलाई सन् २०१७ देखि भारतीय विद्यार्थीसरह भर्ना सुविधा उपलब्ध गराउने भएको छ । इन्डियन इन्स्टिच्युट अफ टेक्नोलोजीमा नेपाली विद्यार्थीले यो सुविधा उपभोग गर्न पाउनेछन् । भारतीय राष्ट्रपति मुखर्जीले सोही कार्यक्रममा यस्तो घोषणा गरेका हुन् ।
कार्यक्रममा परराष्ट्रमन्त्री डा. प्रकाशशरण महतले नेपाल र भारतबीचको सम्बन्ध अन्य देशसँग तुलना गर्न नसकिने बताए ।
मुखर्जी बिहीबारै प्रधानमन्त्री पुष्पकमल दाहालले होटेल द्वारिकाजमा आयोजना गरेको रात्रीभोजमा सहभागी भए । उनी शुक्रबार दिउँसो जनकपुर र पोखरा भ्रमणमा जाने कार्यक्रम छ । तीनदिने राजकीय भ्रमणमा आएका मुखर्जी शुक्रबारै अपराह्न ५ बजे भारतीय एयर फोर्सको विशेष विमानबाट स्वदेश फर्किने कार्यक्रम छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)