मुखर्जीले पशुपतिमा बिताए ५५ मिनेट

काठमाडौंः भारतीय राष्ट्रपति प्रणव मुखर्जीले बिहीबार पशुपतिनाथ मन्दिरमा करिब ५५ मिनेट पूजा गरेका छन् । दर्शन र पूजापछि उनले धार्मिक, सांस्कृतिक एवं ऐतिहासिक महत्वको पवित्र पशुपतिनाथ मन्दिरमा आउन पाउँदा आफूलाई धेरै खुसीको अनुभूति भएको बताए । विदेशमन्त्री हुँदा सात वर्षअघि मुखर्जी पशुपतिनाथ आएका थिए ।

बिहान १० बजेर १५ मिनेट जाँदा पशुपति पुगेका राष्ट्रपति मुखर्जीलाई स्थानीय पशुपति सिर्जनशील युवा क्लबले बाँसुरी र नव अमरकान्तेश्वर युवा क्लबले धिमे बाजाले स्वागत गरेका थिए । मन्दिर प्रवेशलगत्तै गार्गी कन्या गुरुकुलका ११ कन्या, वैदिक भेषमा आएका राम मन्दिरका १० बटुक र दौरासुरुवाल, कोट र टोपी लगाएका वेद विद्या श्रमका बटुकले स्वस्तीवाचन गरेका थिए ।

बासुकीनाथ मन्दिरमा रुद्राभिषेक गरेर पूजा सुरु गरेका मुखर्जीले गुप्तेश्वर, शेषशाही, ढुण्डी गणेश, सूर्यनारायण, गरुड नारायण, सरस्वती देवीदेवताको दर्शन र पूजा गरेका थिए ।

बागमती नदीप्रतिको जिज्ञासामा पशुपति क्षेत्र विकास कोषका सदस्यसचिव गोविन्द टन्डनले अन्नपूर्णसँग भने, ‘नदी र आर्यघाटको संरक्षण र संवद्र्धनका लागि कोषको केकस्तो परियोजना छ त्यसबारे चासो राखेकाले जानकारी गरायौं ।’
सात वर्षअघि आउँदा दुर्गन्धित बागमती अहिले सफा भएको प्रतिक्रिया मुखर्जीले दिएका थिए ।

मुखर्जीले सन्तापहरेश्वर, कृतिमुख, शितलाभैरव, कोटीलिंगेश्वर, उन्मत्तभैरव, नवग्रहको दर्शन र पूजा गरी दक्षिणढोकास्थित अघोरको मुहारको दर्शन गरेका थिए । उनले दर्शन र पूजा गरिएका सबै मन्दिर र मूर्तिमा खाममा पैसा राखेर दानपात्रमा हालेका थिए । उनले गर्भगृहमा प्रवेश गरी दक्षिणतर्फ बसेर पञ्चामृत स्नानसहितको विशेष पूजा गरेका थिए ।

मन्दिरका मूलभट्ट गणेश भट्टले २७ हजार रुपैयाँको रुद्राभिषेक र पञ्चामृत स्नान गरेका थिए । मुखर्जीले पूजापछि सवा लाख बत्तीको आरती गरेका थिए । आरतीपछि पूर्वी ढोकामा अवस्थित तत्पुरुष, पश्चिम ढोकामा अवस्थित सद्योजात र उत्तरी ढोकामा अवस्थित वामदेवको दर्शन गरेका थिए । उनले हनुमानको दर्शन गरेपछि मन्दिर प्रांगणकै द्रव्येश्वर र सत्यनारायण मन्दिरको बीचमा राखिएको आगन्तुक पुस्तिकामा मन्तव्य लेखी हस्ताक्षर गरेका थिए ।

पुस्तिकामा राष्ट्रपति मुखर्जीले पशुपतिनाथमा विशेष पूजा गर्न पाउँदा आनन्द अनुभूति भएको उल्लेख गरेका छन् ।

पशुपतिनाथ मन्दिर नेपाल र भारतको भक्तजनका लागि समान रूपमा आस्थाको केन्द्र भएको उनले पुस्तिकामा लेखेका छन् । मन्दिर प्रांगणमा पुग्दा भूकम्पले मन्दिर र मूर्तिमा पारेको असरबारे मुखर्जीले जिज्ञासा राखेका थिए । कोषले मुखर्जीलाई साढे तीन फिट अग्लो विभिन्न देवीदेवता रहेको नटराजको कलात्मक मूर्ति उपहार दिएको थियो ।