देउवालाई जेएनयूको मानार्थ विद्यावारिधि
![देउवालाई जेएनयूको मानार्थ विद्यावारिधि](https://annapurnapost.prixacdn.net/media/albums/Sher-Bahadur-Deuba-581fd76be46fb9.74157997_0MkATfZ3Vs.jpg)
नयाँदिल्ली: कांग्रेस सभापति तथा पूर्वप्रधानमन्त्री शेरबहादुर देउवालाई दिल्लीस्थित जवाहरलाल नेहरु विश्वविद्यालय (जेएनयू) ले मानार्थ विद्यावारिधिको उपाधिले सम्मानित गरेको छ ।
आइतबार विश्वविद्यालयको कन्भेन्सन हलमा आयोजित बाह्रौं नेहरू स्मृति व्याख्यान कार्यक्रमका बीच विश्वविद्यालयका उपकुलपति प्रा.जगदेश कुमारले देउवालाई उक्त उपाधिले सम्मानित गरे ।
यो उपाधिबाट सम्मानित हुने देउवा पहिलो नेपाली हुन् । यसअघि यस्तो सम्मान भारतीय पूर्वराष्ट्रपति एपीजे अब्दुल कलाम र राष्ट्रपति प्रणव मुखर्जीलाई पनि दिइएको थियो ।
कार्यक्रममा उपकुलपति जगदेश कुमारले नेपालको राजनीतिमा देउवाले खेलेको सशक्त भूमिकाको सम्मानस्वरूप मानार्थ विद्यावारिधि उपाधिले सम्मानित गरिएको बताए ।
पत्नी आरजू देउवाका साथ भारत भ्रमणमा रहेका देउवाको सम्मानमा आइतबार नेपालका लागि भारतीय राजदूत रन्जित रेले रात्रिभोज आयोजना गरेका थिए ।
गोवामा इन्डिया फाउन्डेसनको कार्यक्रममा सहभागी भएर शनिबार दिल्ली आएका सभापति देउवाको सोमबार प्रधानमन्त्री नरेन्द्र मोदीसँग भेट गर्ने कार्यक्रम रहेको नेपाली दूतावास स्रोतले जनाएको छ ।
भारतीय सुरक्षा सल्लाहकार अजित दोभालसँग सोमबार बिहान भेट गरेपछि मोदीसँगको भेटको समय तय हुने बताइएको छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)