काठमाडौं: पूर्वप्रधानमन्त्री एवं नेपाली कांग्रेसका सभापति शेरबहादुर देउवाले भारतको सुरक्षा चासो र अतिवादको जोखिमप्रति नेपाल सजग रहेको बताएका छन् ।
जवाहरलाल नेहरू विश्वविद्यालयले नयाँदिल्लीमा आइतबार आयोजना गरेको 'एक्काइसौं शताब्दीमा लोकतन्त्र र प्रगति' विषयक प्रवचन कार्यक्रमलाई सम्बोधन गर्दै देउवाले उक्त कुरा बताएका हुन् । 'भारत अहिले २१ औं शताब्दीको निर्धारक बन्न अग्रसर छ । भारतको यो प्रयासप्रति नेपाली जनताको साथ रहेको हामी आश्वस्त पार्न चाहन्छौं', उनले भने, 'खासगरी भारतका सुरक्षा चासो र अतिवादको जोखिमप्रति हामी सजग छौं ।'
गत वर्ष नेपालमा नयाँ संविधान जारी भएपछि मधेसी दलले त्यसमा असन्तुष्टि जनाएकाले ती असन्तुष्टि सम्बोधनका लागि संविधान संशोधन हुन लागेको उनले बताए । 'विशेषगरी तराईमधेसका राजनीतिक दल तथा अन्य दलहरूलाई समेत मान्य हुने गरी नयाँ संविधानलाई सर्वस्वीकार्य बनाउन संविधान संशोधन गर्न हामी प्रतिबद्ध छौं', देउवाले भने ।
भारतले नेपालको नयाँ संविधानको हालसम्म स्वागत गरेको छैन भने मधेसका माग सम्बोधन गर्न निरन्तर दबाब दिइरहेको छ । भारतले मधेसी दलले उठाएका सबै माग सम्बोधन गर्न नेपाललाई तीव्र दबाब दिइरहेकै बेला भारत पुगेका देउवाले संविधान संशोधन गर्न प्रतिबद्धता जनाएका हुन् । नेपालको तीनदिने राजकीय भ्रमणमा आएका भारतीय राष्ट्रपति प्रणव मुखर्जीले संविधान संशोधन गरी मधेसलगायत सबै पक्षलाई सर्वस्वीकार्य बनाउन सुझाएका थिए ।
देउवाले नयाँ संविधानले महिला, मधेस, जनजाति सबैका अधिकार सुनिश्चित गरेको बताए । 'समग्रमा भन्नुपर्दा नेपालको आधुनिक इतिहासका झन्डै २५० वर्षमा नयाँ संविधान सबैभन्दा उदार र लोकतान्त्रिक छ', उनले भने ।
भारतको सत्तारूढ दल भारतीय जनता पार्टी निकट एक थिंक ट्यांकको निमन्त्रणामा भारत भ्रमणमा रहेका देउवाले भारत र नेपालबीच जनस्तरको सम्बन्ध विस्तार हुँदै गइरहेको दाबी गरे । 'जनताबीच बढिरहेको विश्वासले हामीलाई आशा जगाएको छ', उनले भने ।
देउवाले नेपाल र भारतबीचको इतिहास साझा रहेको र भविष्य पनि साझा रहने बताए । 'हामी भूगोल, संस्कृति र धर्मले एकअर्कामा गाँसिएका छौं', उनले भने । हजारौं विद्यार्थी जेएनयूलगायत भारतीय विश्वविद्यालयमा अध्ययन गरिरहेको बताए ।
उनले भारतसँगको साझेदारीबाट नै नेपालले आर्थिक प्रगति गर्नसक्ने बताए । देउवाले नेपाल र भारतका स्वतन्त्रता आन्दोलनमा एकअर्काले योगदान दिएको बताए ।
उनले महात्मा गान्धी, जवाहरलाल नेहरू र जयप्रकाश नारायणलगायतबाट नेपालको लोकतान्त्रिक आन्दोलन प्रेरित भएको बताए । 'नेपालको लोकतान्त्रिक उपलब्धिमा भारतको समर्थन र ऐक्यबद्धता रहँदै आएको छ', उनले भने । उनले नयाँदिल्लीमा भएको बाह्रबुँदे सहमतिले नेपालको सशस्त्र माओवादी युद्ध अन्त्य गर्दै लोकतान्त्रिक व्यवस्था पुनर्स्थापित गरेको र त्यसमा भारतको महत्त्वपूर्ण भूमिका रहेको बताए । 'बिनारक्तपात राजतन्त्र अन्त्य भयो । यसमा भारतको महत्त्वपूर्ण योगदान छ', उनले भने ।
प्रतिक्रिया दिनुहोस !
