प्रमुख पर्यटकीय गन्तव्य बन्दै बेगनास
लेखनाथः सुन्दर र शान्त वातावरण मनपराउने पर्यटकको प्रमुख गन्तव्य बेगनास ताल किनारको माझीकुना भएको छ । पोखरा घुम्न आउने पर्यटकले पछिल्लो समय पोखरासँगै जोडिएको लेखनाथ नगरपालिकाको बेगनास तालतर्फ आकर्षित हुन थालेकाले उक्त ठाउँ प्रमुख पर्यटकीय गन्तव्यमा परेको हो । यहाँको सुन्दरी डाँडा र पचभैया क्षेत्र पनि पर्यटकको रोजाइमा परेको छ ।
पर्यटकको आगमनमा वृद्धिसँगै यहाँका स्थानीयले सुविधा सम्पन्न होटल निर्माण गर्न थालेका छन् । बेगनास ताल किनारमा ठूला लगानीका होटेल खोल्ने क्रम जारी छ । गत पाँच वर्षदेखि बेगनास ताल किनारको माझीकुना क्षेत्रका व्यवसायीले होटेलमा लगानी बढाउँदै गएको होटल तथा रेस्टुरेन्ट व्यवसायी समिति लेखनाथका अध्यक्ष दामोदरभक्त थापाले बताए ।
विदेशी र स्वदेशी पर्यटकमाझ लेखनाथको लेकसाइड माझीकुना रोजाईमा पर्दै गएको उनले सुनाए । सात तालको सहर भनेर चिनिने लेखनाथ पोखराबाट छाँयामा पर्दै गएको थियो । लेखनाथको सुन्दरी डाँडामा बेगनास ताल रिर्सोट सञ्चालनमा आए पछि पर्यटन व्यवसायीको आकर्षण पनि यहाँ बढ्दै गएको छ ।
पोखरा भन्दै घुम्न आउने पर्यटकको लागि लेकसाइड मुख्य गन्तव्यमा पर्छ । पछिल्लो समय पर्यटकले लेकसाइडसँगै लेखनाथलाई पनि आफ्नो प्रमुख गन्तव्यमा समेटेका छन् ।
फेवा तालबाट बेगनास तालसम्म सिधा बस सेवा सञ्चालनमा आए पछि यहाँ आन्तरिक र बाह्य पर्यटकको चाँप बढ्दै गएको थापाले सुनाए ।
माझीकुनामा पर्यटकको आगमन बढ्न थाले पछि स्थानीयले घरमै पर्यटन व्यवसाय सञ्चालन गर्न थालेका छन् । माझीकुनामा पर्यटकको आगमन बढेपछि विदेशको काम छाडेर होटेल सञ्चालन आएको स्थानीय धुब लामिछानेले सुनाए ।
दश वर्षदेखि कतारमा मजदुरी गरिरहेका लामिछाने आफ्नै घरआगनमा पर्यटक आउन थाले पछि विदेशको जागीर छाडेर होटेल सञ्चालन गरेका हुन् । अहिले उनले सञ्चालन गरेको आयुस गेष्ट हाउसमा पर्यटक भरीभराउँ छन् । बढी मात्रामा इजरायली, फ्रेन्च र जर्मनी पर्यटक आउने गरेको उनले बताए ।
असोजदेखि मंसिरसम्म विदेशी पर्यटकले भरिने र अन्य समयमा आन्तरिक पर्यटकले होटेल चल्ने गरेको उनले सुनाए । माझीकुनामा अहिले नौ होटेल सञ्चालनमा छन् ।
लेखनाथमा तीनवटा स्टार लेवलका होटेलसहित ३०होटेल सञ्चालनमा रहेको होटेल तथा रेस्टुरेन्ट व्यवसायी थापाले बताए । लेखनाथ सेरोफेरोमा सञ्चालित टाइगर माउन्टेन, रुपाकोट रिसोर्ट , बेगनास लेक रिसोर्ट स्टार होटेल हुन् । पछिल्लो समय होटेलमा लगानी गर्नेको संख्या यहाँ बढ्दै गएको उनले बताए ।
प्रतिक्रिया दिनुहोस !
