स्याङ्जामा वर्षे धान उत्पादनमा ६ प्रतिशतले वृद्धि

स्याङ्जाः यस वर्ष ठिक समयमा मनसुन सुरु भई समयमै धान रोप्न पाएका कारण स्याङ्जामा वर्षे धानको उत्पादनमा वृद्धि भएको छ । गतवर्षको तुलनामा यसवर्ष धानको उत्पादनमा ६ प्रतिशत वृद्धि हुने कृषि विकास कार्यालय स्याङजाले जनाएको छ ।

गतवर्षको तुलनामा यसवर्ष ३ हजार ६ सय ५० मेट्रिक टन धान उत्पादनमा वृद्धि भएको हो । गत वर्ष १६ हजार ८ सय हेक्टर क्षेत्रफलमा लगाएको वर्षे धानको उत्पादन ६० हजार ८ सय ४८ मेट्रिक टन थियो ।

यसवर्ष भने ६४ हजार ४ सय ९८ मेट्रिक टन उत्पादन भएको छ । अघिल्लो वर्ष भने १ दशमलब २ प्रतिशतले धान उत्पादनमा वृद्धि भएको वरिष्ठ कृषि विकास अधिकृत तेजप्रसाद दवाडीले जानकारी दिए ।

वर्षा भएसंगै समयमै धान रोप्न पाएपछि यसवर्ष धान उत्पादन वृद्धि हुनेमा किसानहरु ढुक्क थिए । कुलभूगाभ मध्ये यसवर्ष ९८ प्रतिशतमा धान खेती गरिएको थियो । गतवर्ष ३३ मुरी धान उत्पादन भएको क्षेत्रमा यसवर्ष ४५ मुरी धान भित्रयाएको भन्छिन पुतलीबजार नगरपालिका १० का नुमकला चापागाई । ७ रोपनी जग्गामा उनले यसवर्ष हाइव्रेड यूपीएस ३१२ र यूपीएस ३८३ जातका धान रोपेको बताईन् ।

यहांका आँधीखोला किनार, कालीगण्डकी नदी किनार, ज्याग्दीखोला किनार, चापाकोट, रत्नपुर, कुवाकोट ,गल्याङका क्षेत्र, सेतीदोभान फाँटहरु र बिरुवा फाँटहरु, दहथुम, स्वरेक, खिलुङ, पुतलीबजार नगरपालिका वालिङ नगरपालिका, चाकाकोट, रत्नपुर, मल्यांकोट, चिन्नेवास, सेतीदोभान, बिरुवा, बिर्घा, अर्जुनचौपारी, राङभाङ, तुलसीभन्ज्याङ, जगतभन्ज्याङ, गल्याङ धान प्रमुख उत्पादक स्थान हुन् ।

स्याङ्जामा मन्सुरी, हाइव्रेड, यूपीएस ३१२, यूपीएस ३८३, मकवानपुर १, सावित्री, रामधान, सुनौलो सुगन्ध, राधा ४, खुमल ११, खुमल १३ लगायतका उन्नत जातका धान रोप्ने गरिन्छ । बर्मेली, पहेंले, आँप झुत्ते, मनसरा, गुर्जी, एक्ले, जर्नेली, बातिसरा, अनदी, गोरखनाथ, लोकनाथ, खुमल, गोला लगायतका स्थानीय जातका धान पनि रोपिने गरिएको कृषि अधिकृत तीलक विसीले जानकारी दिए । उनका अनुसार धान रोप्ने क्षेत्रफल भने बढेको देखिदैन् ।

पानी लाग्ने खेतमा जेठको अन्तिम सातादेखि पानी नलाग्ने स्थानमा साउनको अन्तिम सातासम्म पनि कुरेरै पनि धान खेती गर्ने गरिएको छ । धान बाली यहांको मुख्य खाद्यान्न बाली हो । जिल्लामा धानको सरदर उत्पादकत्व ३ दशमल ५ मेट्रिक टन प्रति हेक्टर रहेको वालि संरक्षण अधिकृत ख्यामनारायण चापागाई भन्छन् । चापागाईका अनुसार स्याङ्जामा अझ २० प्रतिशत धान काट्न बाँकी छ ।