एकीकृत सहरी विकास परियोजना सुस्त

जनकपुरधामः सडक तथा नाला निर्माणका लागि जनकपुरमा सञ्चालित एकीकृत सहरी विकास परियोजनाको काम ठेकेदार कम्पनीको सुस्तताले ढिलो हुने भएको छ ।

सडक र नालाको जर्जर अवस्थाका कारण विकासको दृष्टिकोणले धेरै पछि परेको जनकपुरलाई यस आयोजनाले काया पलट गर्ने आस राखिएको थियो । तर, निर्माण काममा भइरहेको ढिलासुस्तीले गर्दा सर्वसाधारण सास्ती भोग्न बाध्य छन् । गत वैशाखमा विधिवत रूपमा सुरु भएको परियोजनाअन्तर्गतको निर्माण कार्य ढिलो हुँदै गएको सर्वसाधारणको आरोप छ ।

निर्माणको शिलान्यास गत वैशाखमा भए पनि त्यसपछि बर्खा सुरु भएकाले असार, साउन र भदौ गरी तीन महिनासम्म काम बन्द गरिएको थियो । असोजदेखि फेरि काम सुरु भयो तर ठेकेदार कम्पनीले जति काम सकाउनु पर्ने हो त्योभन्दा धेरै पछाडि छ ।

२०६६ सालमा जनकपुर नगरपालिकासँग सम्झौता गरी एडीबीद्वारा नगरमा प्रमुख तीनवटा क्षेत्र सडक तथा लेनको सुधार, नालाको स्तरउन्नति तथा फोहोर व्यवस्थापन गर्न ८० प्रतिशत अनुदान र २० प्रतिशत ऋण सहयोगम दुई अर्ब सहयोग गरिएको थियो ।

परियोजनाअन्तर्गत एक अर्ब तीन करोडमा रोड तथा नालाको स्तरउन्नतिको ठेक्का जेडआईसी र शर्मा भीजे कन्सट्रक्सनलाई दिइएको र उनीहरूले आफ्नो स्थानीय प्रतिनिधिका रूपमा कालिका रमण कन्सट्रक्सनमार्फत काम गराइरहेको छ ।

दुई वर्षको सम्झौता अवधिमध्ये करिब साढे ८ महिना बितिसक्दा मात्र साढे ३ किलोमिटर नालाको पाइप लगाइएको परियोजना अनुगमनको जिम्मेवारी पाएका डिजाइन सुपरभिजन कन्सलटेन्ट टोलीका प्रमुख बद्रीनाथ झाले बताए ।

दुई वर्षभित्र ३१ किलोमिटर पाइप लगाउनु पर्ने सम्झौता भएको हो तर ठेकेदारको ढिला सुस्तीले गर्दा काम समयमा हुने हो वा होइन भन्ने आशंका उत्पन्न भएको छ । ठेकेदार कम्पनीले हालसम्म व्यवस्थापन रकमबापत १२ करोड ८१ लख एडभान्स र ७ करोड ५० लाखको बिल भुक्तानीसहित २० करोडभन्दा बढी रकम पाइसकेको छ ।