एकै पालीमा तीन शतक

राजकोटः भारतविरुद्धको पहिलो टेस्ट क्रिकेटको पहिलो पालीमा इङ्ल्यान्डका तीनजना ब्याट्सम्यानले शतक बनाएका छन् । इङ्ल्यान्डले तीन ब्याट्सम्यानको शतकमा पहिलो पालीमा सबै विकेट गुमाएर पाँच सय ३७ रन जोड्यो । इङ्ल्यान्डका जोए रुट, मोइन अली र बेन स्टोक्सले शतक बनाएका हुन् । तेस्रो नम्बरमा ब्याटिङ गर्न आएका रुटले एक सय २४, मध्यक्रमका अलीले एक सय १७ र स्टोक्सले एक सय २८ रन बनाए ।

भ्रमणकारी टोली इङ्ल्यान्डले चार विकेटको क्षतिमा तीन सय ११ रनको स्थितिबाट दोस्रो दिन बिहीबारको खेल अगाडि बढाएको थियो । स्टोक्स र अलीले पाँचौं विकेटका लागि एक सय ६१ रनको साझेदारी गरे । त्यसअघि बुधबार रुट र अलीबीच चौथो विकेटका लागि एक सय ७९ रनको साझेदारी भएको थियो । अलीले दुई सय १३ बलमा १३ चौका हिर्काए । स्टोक्सले दुई सय ३५ बलमा दुई छक्का र १३ चौका प्रहार गरे ।

अली र स्टोक्स दुवैले चौथो टेस्ट शतक बनाएका हुन् । रुटले यसअघि ११ औं टेस्ट शतक बनाएका थिए । यसअघि भारतमा भएको टेस्ट क्रिकेटमा अन्तिम पटक सन् २००९ मा भ्रमणकारी टोलीका तीन ब्याट्सम्यानले एउटै पालीमा शतक बनाएका थिए । श्रीलंकाका तिलकरत्ने दिलासन, माहेला जयाबद्र्धने र प्रसन्ना जयाबद्र्धनेले उक्त सफलता हात पारेका थिए ।

यसैगरी टेस्ट क्रिकेटमा इङ्ल्यान्डका तीन ब्याट्सम्यानले एउटै पालीमा शतक बनाएको सन् २०११ पछि यो पहिलो पटक हो । पहिलो पालीमा इङ्ल्यान्डका विकेटकिपर जोनी बेयस्टले ४६ रन बनाए । भारतका बलर रवीन्द्र जडेजाले तीन तथा मोहम्मद सामी, उमेश यादव र रविचन्द्रन आश्विनले दुईदुई विकेट हात पारे । अमित मि श्राको नाममा एक विकेट रह्यो ।

भारतले दोस्रो दिनको समाप्तिमा कुनै पनि विकेट नगुमाई ६३ रन जोडेको छ । मुरली विजय २५ र गौतम गम्भीर २८ रनमा अविजित छन् । इङ्ल्यान्ड र भारतबीच पाँच खेलको टेस्ट शृंखला हुनेछ । टेस्ट शृंखला सकिएपछि भारत र इङ्ल्यान्डबीच तीनवटा एकदिवसीय र तीनवटा टीट्वेन्टी प्रतियोगिता पनि हुनेछ ।

भारतले सन् २०१२ यता घरेलु मैदानमा एउटा पनि टेस्ट खेल हारेको छैन । भारत अन्तिम पटक घरेलु मैदानमा इङ्ल्यान्डसँगै पराजित भएको थियो ।