नजिकिँदै गरेको तिहारको रमझमसँगै गायक श्याम सामसोङको तेस्रो एकल एल्बम 'मुर्चुंगा २' र यसको म्युजिक भिडियो श्रोता दर्शकमाझ भिजिरहेको छ । आधुनिक गीतहरूको यस एल्बममा उनले 'पर्दाफास भो' बोलको गीतको भिडियो तयार गरेका छन् । विक्रम राईको शब्द संगीतमा विज्ञान राईले निर्देशन गरेको भिडियोमा केकी अधिकारी र योगन्द्र राईले मोडलिङ गरेका छन् ।
यो एल्बमका कारण पनि यो तिहार श्यामका लागि विशेष बनेको छ । एल्बमको प्रवद्र्धनमा उनले विशेष जोड दिएका छन । त्यसका लागि सांगीतिक चाड तिहार उनका लागि सार्थक बन्ने पक्का छ । २०७४ सालमा भोजपुरकी मैयुङमा भव्य महोत्सव आयोजना गर्ने लक्ष्यका साथ उनी तिम्मा सरोकार समाजमार्फत यस वर्ष देउसीभैलो खेल्न तयारीमा छन् । उनी यस समाजका सचिव पनि हुन् । ख्यातिप्राप्त कलाकारदेखि भोजपुरबाट राजधानी आई बसेका गन्नेमान्ने मानिसकहाँ देउसी खेल्ने समाजको योजना रहेको उनको भनाइ छ । आफ्ना दिदी गाउँमा भएकाले गत सालजस्तै यस वर्ष पनि सानीआमाको छोरीको हातबाट भाइटीका लगाउने तयारीमा छन् ।
२०५७ सालमा पहिलो गीत रेकर्ड गराएका गायक श्यामले भारतको लखनउस्थित भातखण्डे संगीत विश्वविद्यालयबाट शास्त्रीय संगीत (गायन)मा स्नातकोत्तर गरेका छन् । त्यसैगरी उनले बनारस घरानाबाट स्वर्गीय पं. गणेशप्रसाद मिश्रसँग ६ वर्ष संगीत शिक्षा लिएका छन् ।
डीएभी स्कुलमा करिब तीन वर्ष संगीत शिक्षकका रूपमा काम गरेका श्यामको अनुभवमा शास्त्रीय संगीतमा लागेर नेपालमा व्यासायिक रूपमा अगाडि बढ्न निकै कठिन छ । उनी हाल संगीतमा भविष्य बनाउन चाहने विद्यार्थीलाई संगीत सिकाइरहेका छन् । संगीतको जुनसुकै विधामा लागे पनि त्यसको आधार शास्त्रीय संगीत भएको उनको भनाइ छ । 'संगीतको जुनसुकै विधाका लागि शास्त्रीय संगीत आधार भए पनि सिक्नैपर्छ भन्ने छैन । सम्भव भए सिके हुन्छ', गायक श्याम भन्छन्, 'स्वर राम्रो छ भने सिक्नैपर्छ भन्ने छैन ।'
आफूलाई मन पर्ने अग्रज कलाकारको नाम लिनुपर्दा उनी नारायणगोपाल, दीप श्रेष्ठ, अरुण थापालाई सम्झन्छन् । भोजपुरको तिम्मा गाविसमा जन्मेका श्याम २०५५ सालमा काठमाडौं आएका हुन् । गितार बजाएर गाउँमा पनि गाउँदै हिँड्ने श्याम काठमाडौं आउनुको खास कारण उच्चशिक्षा हासिल र संगीतप्रतिको लगाव नै हो ।
प्रतिक्रिया दिनुहोस !
