काठमाडौंमा आयोजित एक सांगीतिक कार्यक्रममा ड्यासमा आएर गायक सत्यराज आचार्यले संगीतकार आरसी थापालाई 'गोडा' गर्न अनुरोध गरे । के हो 'गोडा' सबै अलमलमा परे तर पछि उनले प्रस्ट पार्दै गोडा अर्थात् गोविन्दा डान्स भनेपछि संगीतकार थापाले स्टेजमा आएर बलिउड नायक गोविन्दाकै झल्को आउने नृत्य प्रस्तुत गरेर उपस्थित सबैलाई हँसाए । हेर्दा गोविन्दाजस्तै देखिने आरसी अर्थात् रामचन्द्र थापालाई सानैदेखि संगीतमा सौख थियो । दोलखा चरीकोटमा जन्मिएका उनी १४, १५ वर्षकै उमेरमा विद्यालयका विभिन्न कार्यक्रममा गीत गाउँदै हिँड्थे ।
कुरा २०५४ सालतिरको हो । त्यतिबेला उनी कलेजमा पढ्दै थिए । पपगीतको लहर चलेको थियो । उनले पनि आफ्ना दुई साथीहरू कुलराज थापा र टेन्जिङ सेरप लामासँग मिलेर आरकेटी समूह स्थापना गरे । सोही समूहले 'जिन्दगीको यात्रा' नामक एक एल्बम निकालेर त्यसको एउटा गीत सपनीमा आउने मायाको भिडियोसमेत तयार पारे । अभिनयमा समेत रुचि राख्ने उनले १० वर्ष अगाडि एउटा टेलिसिरियल पनि बनाएका थिए । त्यतिबेला अस्ट्रेलिया जानु परेकाले उक्त टेलिसिरियल प्रसारण हुन नपाएको उनले बताए ।
कर्मभूमि अस्ट्रेलियालाई बनाए पनि आरसी थापाको संगीतप्रतिको लगाभ भने कम भएन । अस्ट्रेलियामा रहँदा पनि गीत लेखन र संगीतमै बिताउन थाले । झन्डै दुई दशकभन्दा लामो समय संगीतमा लगाइसकेपछि एकल संगीतमा एल्बम निकाल्ने आफ्नो धोको उनल पूरा गरेका छन् । दुई वर्षअगाडि उनको एकल संगीतमा रहेको पहिलो एल्बम 'प्रारम्भ'को पहिलो गीत रेकर्ड भएको थियो । आफूलाई मन पर्ने गायकद्वय सत्य र स्वरूपराज आचार्यको स्वरमा आफ्नै संगीतमा पाँचवटा गीत रेकर्ड गराएर उनले एल्बम तयार पारे । नायिकाद्वय प्रियंका कार्की र नन्दिता केसीले मोडलिङ गरेको दुई गीतको भिडियो अहिले निकै चर्चित भएको छ ।
आधुनिक, लोक, पप र गजल मन पराउने आरसी आफूले एल्बमको गीतमा विविधता पस्कने प्रयास गरेको बताए । थापा अन्तर्राष्ट्रिय नेपाली कलाकार समाज (इनास) का ग्लोबल महासचिव पनि हुन् । ग्लोबल इनासले सिक्किम इनास र सिक्किम चलचित्र विकास बोर्डसँग मिलेर सिक्किमको ग्यान्टोकमा अवार्ड कार्यक्रमको आयोजना गरेको छ । फुर्सद हुँदा गीतसंगीत र साहित्यमा रुचि राख्ने थापा आफ्नो सांगीतिक समूह आरकेटीको दोस्रो एल्बम निकाल्ने तयारीमा लागेका छन् । आफू जुनसुकै मुलुकमा रहे पनि नेपाली संगीत र कलाकारिता क्षेत्रको उत्थानमा लागिरहने उनको चाहना छ ।
प्रतिक्रिया दिनुहोस !
