कल्याणको कलाकार जीवन
हास्यकलाकार कल्याण रानामगर टेलिभिजनमा छाइरहने कलाकार हुन् । प्रत्येक बुधबार राति टीभी टुडेबाट प्रसारण हुने टेलिसिरियल 'ढुक्क'मा उनी भेटिन्छन् । आफ्ना बाबुबाट प्रभावित भएर कला क्षेत्रमा लागेको बताउँछन् उनी ।
कल्याणका बाबु बलराम रानामगर पनि कलाकार नै थिए । बाबुले विभिन्न जिल्ला घुमेर स्टेज कार्यक्रम देखाउँदै हिँडेको उनी आज पनि सम्झन्छन् । 'बुवा राम्रो कलाकार हुनुहुन्थ्यो, उहाँकै बिँडो थामे मैले', उनी भन्छन् । कल्याणले औपचारिक रूपमा कहिल्यै पनि अभिनय वा नृत्यको तालिम लिएनन् । बाबुको नाच हेरेरै सिके उनले ।
आज पनि कुनै पनि सो हुनुअगाडि आफैं अभ्यास गर्ने गर्छन् । कुनै पनि गीतको शब्द र भाव बुझेपछिमात्र त्यसमा नृत्य अभ्यास गर्ने बानी छ उनको । ऐनाअगाडि उभिएर अभ्यास गर्ने बानी छ उनको । गीतको भाव अनुहारमा झल्काउन सके दर्शक भित्री मनदेखि नै खुसी भएर हाँस्ने, नत्र कलाकारकै हाँसो उडाउने उनको अनुभव छ ।
कल्याण गेटअपमा पनि सचेत छन् । कुनै पनि सोमा जाँदा उनी आफूलाई चाहिने क्याप, हाफ पाइन्ट, भेस्ट, इस्टकोट र टाई आफैं लान्छन् । उनको मेकअप स्टाइल फरक छ । उनी पाउडर, गाजल र लिपस्टिक लगाउँछन् । लिपस्टिक ओठमा मात्रै नभई दर्शकलाई हँसाउन आँखावरिपरि पनि दल्ने गर्छन् । यस्तो गेटअप र मेकअपका साथ उनको कमेडी नृत्य देखेर नहाँस्ने कमै हुन्छन् ।
कल्याणको कलायात्रा नाटकबाट सुरु भयो । गुरु आनन्द थापाको प्रेरणामा उनले राष्ट्रिय सभा गृहमा 'मान्छेले मान्छेलाई नचिन्दा' नामको पहिलो नाटकमा अभिनय गरेका थिए । त्यसपछि डीबी गुरुङको 'सन्ध्याको एक रात'मा अभिनय गरेपछि उनले टेलिचलचित्रमा ब्रेक पाए ।
अमृत शर्माको निर्देशन र उनकै निर्माणमा बनेको 'जिउँदो सहिद' टेलिचलचित्रमा बसुन्धरा भुसाल, राजाराम पौडेललगायतका कलाकारसँग अभिनय गरे उनले । त्यसपछि लगातार करुणा, गंगा, लौन भुतुक्कै पार्यो, आम्मै, ५२ घुस्सा ५३ ठक्करलगायतका थुप्रै सिरियलमा उनले कुशल अभिनय प्रस्तुत गरे । ठूलो पर्दामा भने 'करोडपति', 'विषालु' लगायतका चलचित्रमा अभिनय गरिसकेका छन् ।
उनको मेकअप स्टाइल फरक छ । उनी पाउडर, गाजल र लिपस्टिक लगाउँछन् । लिपस्टिक ओठमा मात्रै नभई दर्शकलाई हँसाउन आँखावरिपरि पनि दल्ने गर्छन् ।
पेसाले सरकारी जागिरे हुन् उनी । २०५५ सालमा स्थानीय विकास मन्त्रालयअन्तर्गतको मध्यमाञ्चल क्षेत्रीय निर्देशनालयबाट जागिरे जीवन सुरु गरे । अहिले महिला मन्त्रालयमा संघसंस्था शाखामा कार्यरत छन् । जागिर र कलाकारितामा समय व्यवस्थापन गर्न सिपालु छन् उनी । उनलाई अलि गाह्रै पर्छ तर पनि शुक्रबार हाफ छुट्टीपछि सुटिङमा निस्केर आइतबार जागिर भ्याउने गर्छन् उनी ।
इच्छा भए उपाय अनेक भन्नेमा विश्वास गर्ने कल्याणको नृत्यप्रतिको लगाव सानैदेखिको हो ।सुरुमा उनी विद्यालयमा नृत्य सिकाउँथे । पछि गएर रेस्टुरेन्टमा नाच्ने कामसमेत गरे । त्यसपछि नाटक र अनि विभिन्न टेलिचलचित्र र चलचित्रमा हास्य अभिनेताको भूमिका खेल्न थाले ।
मह जोडी, जितु नेपाल, शैलेन्द्र सिम्खडा, राजाराम पौडेल, किरण केसीलगायतका कलाकार मन पराउने कल्याण हिजोआज हास्यकलाकारले बजारभाउ पाएकोमा प्रसन्न छन् ।
प्रतिक्रिया दिनुहोस !
