म्याद नाघेका १७ हजार लिटर तेल नष्ट

निजगढ ः म्याद नाघेपछि बिक्रीका लागि राखिएको लाखौ मूल्य बराबरको तेल जिल्ला प्रशासन कार्यलयले नष्ट पारेको छ ।

निजगढस्थित ईशा सप्लायर्सको गोदामबाट बरामद गरिएको ‘सदाबहार’ ब्रान्डको म्याद नाघेका १७ हजार लिटर रिफाइन स्वायविन तेल प्रशासनले बकैया खोलामा जलाएर नष्ट पारेको हो । नष्ट गरिएको तेलको मूल्य २५ लाख रुपैयाँ बराबरको रहेको जिल्ला प्रशासन कार्यलयले जनाएको छ ।

अखाद्य तेलको बिक्रीवितरण भइरहेको सूचना पाएपछि पुगेको जिल्ला अनुगमन टोलीले दुई साताअघि ईशा सप्लायर्सबाट तेल बरामद गरेको थियो । दुई सयभन्दा बढी जर्किनमा भरेर गोदाममा राखिएको अवस्थामा तेल फेला पारेपछि टोलिले सप्लायर्सका सञ्चालक रमेश दंगाललाई नियन्त्रणमा लिई तेलको नमूना हेटौडास्थित खाद्य प्रयोगशालामा पठाएको थियो ।

प्रयोगशालाबाट बरामद गरिएको तेल खान योग्य नरहेको र स्वास्थ्यमा गम्भिर असर पुर्याउने बताएपछि प्रशासनले जलाएर नष्ट पारिएको हो । अखाद्य तेल बिक्रीका लागि राखेका सञ्चालकलाई भने प्रशासनले एक लाख धरौटीमा छाडेको छ । जिल्ला प्रशासन कार्यलय बाराका सहायक प्रमुख जिल्ला अधिकारी मुकेशकुमार केशरीले दंगालमाथि कालोबजारी नियन्त्रण ऐनअन्तर्गत कारवाही सुरु गरिएको बताएका छन् ।

‘बढी नाफा कमाउने उद्देश्यले अखाद्य तेल बिक्रीका लागि राखिएको पाइयो’ सहायक प्रजिअ केशरीले भने ‘सञ्चालकमाथि कारवाही प्रक्रिया सुरु गरिसकेका छौ र अखाद्य तेल नेपालमा कसरी भित्रियो भन्ने बारेमा पनि अनुसन्धान भइरहेको छ ।’ खाद्य प्रयोगशालाका अनुसार बरामद गरिएको पाँच महिनाअघिनै तेलको म्याद गुज्रिसकेको थियो ।

प्रयोगशालामा परीक्षण गर्ने क्रममा तेलले स्वास्थ्यमा गम्भिर असर ल्याउन सक्ने देखिएको खाद्य अनुसन्धान अधिकृत प्रेमचन्द्र झाले बताए । ‘यो तेल बजारमा गएको भए नराम्रो असर पर्न सक्थ्यो,’ झाले भने ‘तेलको पेरोअक्साइड भ्यालु १० हुनु पर्नेमा ४० देखियो । उक्त तेल खानका लागि योग्य मानिदैन् ।’

सहायक प्रजिअ केशरीले भारतबाट अवैध रूपमा आयात गरी नयाँ जर्किनमा राखिएको तेल देशका विभिन्न जिल्लामा पुर्रयाएर बिक्री हुने गरेको बताए । अनुगमन टोली गोदाममा पुग्दा नौ हजार लिटरभन्दा बढी तेल ग्यालिनमा राखेको अबस्थामा फेला परेको र बा“की भारतीय कम्पनीको प्याकेटमा नै रहेको केशरीले बताए ।

प्याकेटमा राखिएको उक्त तेल २०१५ को नोभेम्बरमा प्याकिङ गरिएको थियो र सो अवधीले अहिले म्याद नाघेको पाँच महिना नाघिसकेको केशरीले बताए । ‘कम्पनीको प्याकेटमा उल्लिखित समयावधी हेर्दा पाँच महिना नाघिसकेको छ । यस्तो अवस्थाको तेललाई नयाँ जर्किनमा भरेर बिक्रीका लागि पठाउन खोजेको पाइयो’ केशरीले भने ‘बढी मुनाफाका लागि स्वास्थ्यसँग खेलबाड गर्नु अपराध हो, हामी कारवाही गर्छौ ।’

म्याद नाघेको तेल कसरी र कहिले भित्रिएको भन्ने बारेमा अनुसन्धान सुरु भइसकेको भन्दै केशरीले अखाद्य वस्तु नेपाल भित्रिनु गम्भिर बिषय भएको बताए । धरौटी राखेर रिहा भएका सप्लायर्सका सञ्चालक दंगालले भने नाकाबन्दीको समयमा आयात गरिएको तेल समयमै बिक्री गर्न नसक्दा म्यान नाघेको र उक्त तेल बिक्रीका लागि गोदाम नराखिएको बताए ।