काठमाडौंः प्रधानमन्त्री पुष्पकमल दाहाल ‘प्रचण्ड’ आरामका लागि शनिबार दिउँसो सुकुटे पुगेका छन् । प्रचण्ड आरामका लागि सिन्धुपाल्चोकको सुकुटे पुगेका हुन् ।
प्रधानमन्त्री प्रचण्ड सिन्धुपाल्चोकका सुरक्षा अधिकारी र प्रशासनलाई जानकारी नै नदिइ सुकुटे पुगेका थिए । प्रचण्ड विशेष निर्णय गर्नुपर्दा एकान्तमा जाने गर्छन् । पछिल्ला दिनमा संविधान संशोधन, अख्तियार प्रमुखमाथिको महाअभियोगको प्रस्ताव लगायत जटिल विषयमा निर्णय गर्नुपर्ने बेलामा प्रधानमन्त्री सुटुक्क सुकुटे पुग्नुलाई महत्वका साथ हेरिएको छ ।
प्रधानमन्त्रीका प्रमुख स्वकीय सचिव जोखबहादुर महराले भने, ‘आरामका लागि सुकुटे आउनु भएको हो । आज आराम गरेर भोली राजधानी फर्कने कार्यक्रम छ।’
दाहाल पार्टी अध्यक्ष हुँदा पनि पटक–पटक सुकुटे बीच रिसोर्टमा गएर आराम गर्ने गर्थे । प्रचण्ड पत्नी सीतासहित उनका प्रमुख स्वकीय सचिव महरा र स्वकीय सचिव समेत रहेका पुत्र प्रकाश दाहाल गएका छन् ।
सुकुटे जानु अघि प्रधानमन्त्री दाहालले सिन्धुपाल्चोकका माओवादी केन्द्रका नेतालाई पनि जानकारी दिएका थिएनन् । प्रधानमन्त्री दाहाल सुकुटेपुगेपछि भने सिन्धुपाल्चोकका माओवादी केन्द्रका नेताहरु त्यहाँ पुगेका छन् ।
प्रतिक्रिया दिनुहोस !
