‘राष्ट्रिय नेता उपचार कोष’ बन्योः लालबाबु पण्डितले गरे एक रुपैयाँ सहयोग
मंसिर १, २०७३ बुधबार १५:५:०
काठमाडौं: नेताको उपचारमा राष्ट्रिय ढुकुटी रित्तिएको भन्दै यति स्वास्थ्य विज्ञान प्रतिष्ठान महाराजगञ्जका विद्यार्थीले एक रुपैयाँ संकलन अभियान सुरु गरेका छन् ।
मन्त्रिपरिषद्को निर्णयबाट नेताका निम्ति उपचार खर्च बाँडेर देशको ढुकुटीको दुरुपयोग भएको भन्दै विद्यार्थीहरुले व्यंग्यात्मक अभियान सञ्चालन गरेका हुन् ।
‘गरिब नेताको उपचारको निम्ती धनी जनताको तर्फबाट ‘राष्ट्रिय नेता उपचार कोष’ खडा गर्नको निम्ती सहयोग अभियान लेखिएको ब्यानरसहित विद्यार्थीले अभियान चलाएका हुन् ।
स्वास्थ्य विज्ञान प्रतिष्ठानका विद्यार्थीको अभियानप्रति एक्यबद्धता जनाउँदै पूर्वसामान्य प्रशासन मन्त्री एवम् एमाले नेता लालबाबु पण्डितले एक रुपैयाँ दिएर अभियानमा साथ दिएका छन् ।
अभियानमा संलग्न विद्यार्थीले जनताको पसिनाबाट उठेको करले आफूखुशी उपचारको नाममा करोडौँ रकम सक्ने प्रवृत्तिको विरोध गरेका छन् ।
विभिन्न नारा लेखिएको प्ले कार्ड बोकेर विद्यार्थीहरु महाराजगञ्जबाट एक रुपैयाँ संकलन गर्दै प्रधानमन्त्री निवास बालुवाटारसम्म पुगेका थिए ।
विरोध प्रदर्शनमा उत्रिएका विद्यार्थीले सरकारले नेता र विशिष्ट व्यक्तिलाई नीति बनाएर उपचार खर्च उपलब्ध गराउन माग गरेका छन् ।
‘कालिकोटमा मान्छे खाना नपाएर कुपोषणले मरेका छन् तर यहाँ नेताको उपचारका नाममा सरकारले लाखौँ र करोडौँ दिनथालेपछि यति स्वास्थ्य विज्ञान प्रतिष्ठानका विद्यार्थीले सांकेतिक विरोध जनाएका हौँ,’विरोध प्रदर्शनबारे जानकारी दिदै पब्लिक हेल्थको पाँचौ सेमेस्टरका विद्यार्थी राजन लामिछाने अन्नपूर्ण अनलाइनसँग भने ।
एक रुपैयाँ संकल अभियानबाट बुधबार विद्यार्थीहरुले पाँच सय १६ रुपैयाँ संकलन गरेका छन् । विद्यार्थीले संकलन गरेको पैसा बिहीबार सिडियो मार्फत् प्रधानमन्त्री पुष्पकम दाहाल ‘प्रचण्ड’लाई बुझाउने तयारी गरेका छन् ।
प्रतिक्रिया दिनुहोस !
