विश्वको आँखा अहिले अमेरिकाका राष्ट्रपति डोनाल्ड ट्रम्पमा केन्द्रित छ । आफ्ना अनौठा आनिबानीका कारण उनी चर्चित बनेका छन् । विशेषगरी महिलाप्रति उनको दृष्टिकोणले आलोचित पनि हुन पुगेका छन् । 'मिस यूएसए' प्रतियोगिताका संस्थापक र मिस टिन अमेरिका, मिस युनिभर्र्सलगायतका प्रतियोगिताका सञ्चालकका रूपमा रहेका डोनाल्डको नाम बेलाबेलामा थुप्रै सुन्दरीसँग जोडिएको थियो ।
सन् १९५२ मा क्यालिफोनिर्याको एक पोसाक कम्पनी प्यासिफिक निटिङले सुरु गरेको मिस युनिभर्स प्रतियोगितालाई पछि उनले निरन्तरता दिएका थिए । सन् १९८३ मा मिस टिन प्रतियोगिता सुरु भएको थियो भने मिस यूएसए प्रतियोगिता सन् १९९६ देखिमात्रै सुरु भएको हो । दुई दशकको अवधिमा सुन्दरी प्रतियोगिताको माध्यमबाट चार हजारभन्दा बढी सुन्दरी उनको सम्पर्कमा आएको अन्तर्राष्ट्रिय सञ्चार माध्यमको दावी छ ।
विभिन्न समयमा अनेकौं सुन्दरीसँग नाम जोडिएकाले उनी बेलाबेला विवादमा पनि परे । तीमध्ये पिपुल म्याग्जिनकी एक महिला रिपोर्टर पनि एक हुन् । सन् २००५ मा डोनाल्डको अन्तर्वार्ता गर्ने क्रममा उनलाई धकेलेर भित्तामा पुर्याएको र चुम्बन गरेको आरोप उनले लगाएकी थिइन् । कुनै पनि महिलालाई अनुमति बिना चुम्बन गर्नु डोनाल्डको कमजोरी हो भन्ने ती रिपोर्टरले आफ्नो नाम भने गोप्य राखिन् ।
डोनाल्डले सञ्चालन गरेका सुन्दरी प्रतियोगितामा सहभागी भएका केही मोडेलले आफूहरूलाई उनले यौन दुव्र्यवहार गर्ने गरेको आरोपसमेत लगाएका थिए । यिनैमध्येकी पूर्वमिस भेनेजुएला एलिसिया मचोडासँगको विवाद निकै लामो समय लम्बिएको थियो । सन् १९९६ मा उनले मिस युनिभर्सको ताजसमेत जितेकी थिइन् । मिस युनिभर्स बनेपछि उनको तौल बढेको थियो । तर डोनाल्डले उनलाई तौल नघटाए मिस युनिभर्सको ताज खोसिने भन्दै धम्की दिने गरेको गुनासो मचोडाले गरेकी थिइन् । त्यतिमात्रै होइन डोनाल्डले बारम्बार होच्याएको र बेइज्जत गर्न खोजेका आरोप पनि लगाएकी थिइन् ।
मिस यूएसए योलान्ड बेतवेजले स्विमसुट लगाएर तस्बिर खिच्न अस्वीकार गरेकी थिइन् । त्यतिखेर डोनाल्डले उनीहरूलाई स्विमसुट सानो भएको र हिलमात्रै अग्लो भएको प्रतिक्रिया दिएका थिए । यतिमात्रै नभई उनका अनेकौं खराब बानीव्यवहारका बारेमा सुन्दरीहरूले विभिन्न सञ्चारमाध्यममार्फत खुलासा गरेका छन् । उनी मिस टिन अमेरिकाका प्रतियोगीको लुगा फेर्ने कोठामा कसैलाई थाहै नदिई छिर्ने गरेको आरोप लागेको थियो । कोठामा कोही लुगा फेर्दै हुन्थे त कोही नांगै ।
अचानक ट्रम्टलाई देख्दा आत्तिएर हतारहतार लुगा लगाएको अनुभव मिस टिन १९९७ भेरमोन्टले दावी गरेकी छन् । मिस यूएसए प्रतियोगीको लुगा फेर्ने कोठामा पनि उनी यसरी नै पस्ने गरेको प्रतियोगी एरिजोना टासा डिक्सनले दावी गरेकी छन् ।
एसोसिएट प्रेसका अनुसार डोनाल्डकी पत्नी मेलानियाले आप्रवासी कानुन तोड्दै काम गर्ने अनुमति नलिई मोडलिङ सुरु गरेकी थिइन् । उनी अमेरिकामा दस वटा मोडलिङ एजेन्सीका लागि अनुबन्धित भएकी थिइन् । उनले त्यतिबेला वार्षिक बीस हजार डलरभन्दा धेरै आम्दानी गर्थिन् जुन कमाइ उनको काम गर्ने कानुनी अनुमति पाउनुभन्दा पहिले थियो ।
डोनाल्डले पनि आफ्नी पत्नी गलत नभएको र उनको बारेमा अरूले गरेका टीकाटिप्पणी सही नभएको बताउने गरेका थिए । मेलानिया र डोनाल्डको भेट पनि मोडलिङ प्रतियोगिताकै क्रममा भएको थियो ।
पूर्वराष्ट्रपति बाराक ओबामालाई समेत आईएसका संस्थापक भन्ने गरेका डोनाल्डको रुचिमा काला जातिका महिला भने कहिले परेनन् । उनले आफ्ना प्रतियोगितामा पनि काला जातिका महिलालाई भाग लिन दिने कुरामा हिचकिचाउने गर्थे ।
चुनावी अभियानका क्रममा मेक्सिकनलाई अपराधी, बलात्कारी भन्दै उनले दिएका अभिव्यक्तिका कारण गत वर्षको मिस यूएसए प्रतियोगिता तीन महिना पछि सरेको थियो । गत वर्षको जुलाईमा उक्त प्रतियोगिता हुने भनिए पनि कार्यक्रम सञ्चालक, निर्णायक, प्रायोजकलगायत सबैले उनको साथ छाडेपछि उनी प्रतियोगिता बेच्न बाध्य भएका थिए । डोनाल्डले यस प्रतियोगिताको अधिकारलाई गत वर्षको सेप्टेम्बर महिनामा ५० मिलियन डलरमा बेचेका थिए ।
(एजेन्सीको सहयोगमा)
प्रतिक्रिया दिनुहोस !
